Nigeria hmarchhak biala khaw pakhata sikul pathum atangin silai kengten naupang 50 chuang an ru bo niin zirtirtu leh nu leh paten BBC an hrilh.
A tam zawk hi kum hnih leh kum nga inkar an ni.
Zirtawpni zinga Borno state-a Mussa-a pawikhawihna thleng hmutute chuan mi sualte hian motorbike-a an tlanchhiat laiin naupangte hi venhim hna thawktuten an beih let theih loh nan inphen nan an hmang niin an sawi.
Pawikhawihna thleng hi eng pawl mahin an tihah an la chhal lo va. Sorkarin engmah sawi a la nei lo va; mahse, Inrinni khan Borno South-a Senator Ali Ndume-a’n a mi mala thuchhuah a siamah sikul pahnih atangin naupang 42 vel ruk bo an nih thu a tar lang tawh thung.
Ruk bote hi khaw chhunga Government Day Secondary School, Mussa Central Primary School, leh State Universal Basis Education Board (SUBEB) Secondary School-a mite an ni.
Mi thenkhat chuan pawikhawihna thleng hi Islamist pawl, Boko Haram leh an elpui, Islamic State West Africa Province (Iswap) ten he bial thunun tuma an inbeihna kal zel lantirna pakhat niin an sawi.
Tun lai hian Nigeria-ah hian mi sual pawl hrang hrangten a hlawma mi ruk bo an thlen zing hle.
Borno state-a tual chhung mite hi kum tam tak chhung chu him lo takin an lo awm tawh a. Tun tuma thil thleng vang hian Mussa-a cheng thenkhat chu an tlanchhiat phah mek.
Patrol-a kal sipaiten khua an chhuahsan hnu lawkah firfiak nia rinhlelhte hian motorcycle-in sikulte hi an thleng niin mipuite chuan an sawi a. “An chhuah hnu lawkah a ni a, minute 30 pawh a tling lo vang,” tiin a fanu an ruksaka tel ve, Bukar Buba chuan a sawi.
Hmutute chuan silai kengte hian silai pawh an hmet puak a, mipuite chu biru turin an tlan a ngai niin an sawi a. Nu leh pa tam tak chuan an fate an phurh chhuah lai hi a bula tlang atangin tanpui thei si lovin an en liam a ni.
Zirlai upa deuh zawk thenkhat chu buaina chhuak lai hian an bula thing hmunah an tlanchhe thei niin mi chengte chuan an sawi.
Lo neitu tamna, sum leh paia harsatna tawk mekte chuan naupangte him taka an kir leh theihna tura pui turin sorkar an ngen nghal a ni.
Thuneitute chuan a hmunah sipaite an awm mek tih sawiin ruk botute zawn chhuah tumin hma an la chhunzawm zel tih an sawi.