Aizawl: Salvation Army, India Eastern Territory hnuaia Salvation Army thalaite leh corps ten Pathianni khan SAY Sunday an hmang.
SAY Sunday pual hian Inrinni khan corps hrang hrangte chu Mizoram chhunga Salvation Army Institution hrang hrang bakah Cancer Hospital leh mi harsate hnenah an luang chhuak a. Pathianni khan corps hrang hrangah speaker-te sawmin crusade buatsaih a ni a, corps thenkhat chuan thusawi turin headquarters-a an hotute an sawm bawk.
Chawhnuah mual inkhawm leh tlaiah chawnghei tawngtaite an huaihawt a. Zanah praise & worship leh thuhrilh inkhawm nen urhsun takin an hmang.
Kumin hian Territorial SAY-in ‘Bring Them In 2.0’ kalpui tura corps tin a ngen angin kumtir atangin membership drive te kalpui a ni a, he ni pual hian khawlai rawngbawlna hun hman thin a nih bakah a thlawna inentirna te, thing phun leh a mamawhtute hnenah luan chhuahna hun an buatsaih bawk.