Aizawl: Mizoram Pradesh Youth Congress Committee chuan Inrinni khan kum 1966-86 chhunga Mizoram buai vanga ram leh hnam tana martar-te lungphun champha vawi 27-na an hmang.
CTI Sesawnga hun hmanah hian MPYCC Senior Vice President Ngurdingpuia Pachuau, chuan thu sawiin martarte chu Congress thalaiten an ngaihlu a, remna leh muanna a awm theih nana mahni inphata lal thutthleng kiantu, Lal Thanhawla leh a thawhpuite an chhuang tak zet tih a sawi.
Congress sorkar chuan martarte tan hmun buatsaihin an chhungte ngaihsak kawngah pawh hma a la nasa a, party thenkhatin inthlan campaign nan an hmang nia sawiin, “Martar chhungte sorkar hna hrang hrang 70 chuang – assistant pahnih, UDC pali, LDC 18, IV grade 46 te chu Pu Lal Thanhawla kaihhruai Congress party-in a pe,” a ti.
PAMRA chhungkaw 200 tan a bikin NLUP tanpuina pek a nih thu leh NLUP Convergence atangin mi 120 pek leh an bawk tih as awi a. Hei bakah hian martar chhungkaw 40 hnenah rangva bundle 250 an pe a, chhungkaw 100 tan NLUP a bika pek an ni tih a sawi.
Congress thalai hruaitu chuan kum 1986 atanga MNF sorkar lai pawha an dinsak theih loh nia a sawi, Peace Accord Review Committee chu kum 2008 khan Congress party-in a dinsak niin a sawi a. “He committee hian martarte chhungkaw tan hamthatna awm theite a dapsakin a ngaihtuahsak thin,” a ti.
Martar-te hriat rengna lungphun, CTI Sesawng hi martar-te puala lungphun hmasa ber niin June 27, 1997 khan Congress president, khatih laia chief minister ni bawk, Lal Thanhawla’n a hawng a. Lungphun hi MPYCC buatsaiha bultan a ni a, kum tin June 27-ah a hmunah hian martarte pualin hun an hmang thin a, tun thlengin mi 1,168 ziah an ni tawh a. Kum 2014 khan Sergeant Lalduha ruhro pawh phum leh niin ziah belh tûr awm angte pawh ziah belh zel theih tûra ruahman a ni bawk.
Inrinnia hun hman hi MPCC Vice President Lalsanglura Sailo-in a kaihruai a. HP Lalchuailova, Vice President MPCC leh Lalnunzira, Treasurer MPYCC ten thu an sawi bawk.