Germany hmar lam, Stade-a youth welfare centre-a inpawng kahna thlengah mi paruk an thi a, an zinga pali hi hmeichhia an ni tih police-in an sawi.
Facility chhunga hmeichhiate leh mipa pakhat kah hlum an ni a, a hnuah mi dang pakhat chu damdawi inah enkawl a nih laiin a thi leh tih police chuan an sawi a. An zavai hian puitling vek an ni.
A kaptu nia hriat hi man a ni a, mi dang pahnih chhui zui mek an ni bawk a. Pawikhawihna thlen chhan hi hriat chian a la ni lo.
Thuneitute chuan Thawhtannia Hamburg khawthlang maia inkahna thlen hnuah hian mipui tan hlauhawm a awm tawh lo tih an sawi a. German chanchinbute chuan a hmunah hian hmeichhia leh naupangte an awm niin an tar lang.
Dankersstrasse-a tual chhung police-te chuan Thawhtanni chawhnu dar 02:15 (India-a tlai dar 05:45) khan thuchhuah siamin ‘youth welfare facility-ah mi eng emaw zat thahna a thleng’ tih an sawi.
Thuchhuah chuan, “Hual a ni a, police tam tak a hmunah an awm,” a ti a. Police-te chuan mipuite chu inthiarfihlim turin an ngen bawk.
A hnuah police thupuangtu chuan hliam tuar pawh an awm thu a sawi a, a bak a sawi lo va, emergency mi tam tak tirh an ni bawk.
German broadcaster pahnih, ZDF leh RTL chuan khawpui thupuangtuin inkahna a thlen lai hian a bula daycare-a naupangte chu a chhungah an awm tih a sawi niin an tar lang a, a hnuah ‘sikul kai rual naupangte’ chu an nu leh paten an la hruai haw tih an tar lang.
Inkahna thlenna hi Lower Saxony state khawpui, Hamburg khawthlang lam km 30 vela hlaa a awm a ni a, mihring 50,000 vel an cheng.