Aizawl: Vigyan Bhawan, New Delhia 16th Conference of the Central Council Health & Family Welfare-ah Thawhlehni khan Health Minister Lalrinpuii telin hriselna lama Mizoram hmalakna hrang hrangte a tar lang.
Lalrinpuii chuan Mizoramin Sustainable Development Goals tihlawhtling tura a hmalakna kalzelah Neonatal Mortality rate leh under 5 Mortality rate pawh 9 leh 18 ve ve-ah tlak a nih thu te, immunisation coverage pawh state data ang chuan 90% lai a nih thu te, non communicable disease-ah inzirtirna leh damdawi semna kalpui a nih thu te, TB rinhlelhawmte X-ray hmanga endik tam lamah India-a titha ber a nih dan te, quality service pek kawngah Mizorama health facility 121 laiin NQAS certification an neih tawh thu te, Niti Ayog-in tehna a siam hmanga aspirational district a endiknaah health & nutrition sector-ah Mamit district chu India-a titha 30na a hauh dan te, health facility zawng zawngah Ayushman Bharat Digital Mission hmalakna kalpui niin Urban Wellness Centre-ah esushrut clinic system hman vek a nih thute a sawi.
Mi rethei zawkte tan chauha sorkar laipui siam, ABPMJAY chu convergence hlawhtling taka kalpuiin Mizoram mipui huapa state sorkarin MUHCS hlawhtling taka a kalpui chhoh dan a tar lang bawk.
Conference of the Central Council of Health & Family Welfare hi Union Health Minister JP Nadda kaihhruaina hnuaia state hrang hrang health minister telna council niin health lama India-a council sang ber a ni a, ram pum huapa hriselna lama hmalakna hrang hrangte thlirho niin hmasawnna tur kawng hrang hrangte an rel ho thin.
Council meeting rual hian hriselna lama hmalakna atana tangkai hrang hrang – National Ambulance Service Guidelines te, Suman Roadmap 2030 te, Samagra Shosu Bal Swasthya Karyakram te, Anaemia Mukt Bharat Abhiyaan te bakah Ayushman Bharat Digital Mission hnuaia hmalakna hrang hrang – Aarogya Setu 2.0 te, Ayushman app te, Drug Registry te, Unified Health Interface te bakah Sushrut Lite te tlangzarh a ni bawk.
Meeting-ah hian Union Minister of State Anupriya Patel leh Prataprao Jadhav te bakah Niti Ayog member Dr M Srinivas, state hrang hrang health minister leh thuneitu sangte an tel a. Mizoram atangin Dr Lily Chhakchhuak, Director, DHS; Dr R. Lalchhuanawma, Mission Director, NHM bakah H. Lalhruaitluanga, Under Secretary ten minister hi an tawiawm.