Aizawl: Home Minister K.Sapdanga chuan sorkar hna lakah thianghlim takin a tling apiangte indawtin lak zel an tum a, zirlaite tan kawng dik zau taka hawngin hah taka zir chu awmzia neihtir an tum tih a sawi.
MZP Gen. Hqrs buatsaiha Thawhlehnia LPS Arena, Falkland, Aizawla Remna Ni kum 40 tlin lawmna neih hmanpuitu khuallian, K. Sapdanga chuan, “Sorkar hna lak reng rengah thianghlim takin, a tling apiangte indawtin kan la zel ang. Tling lo zawk duhsak vanga lak ang hi na taka dodal zel a ni ang a. Chu chuan zirlaite tan kawng dik zau takin a hawng ang a, hah taka zir hi awmzia neihtir kan tum a. Thalaite lo pen chhuak ula, dikna kawngka zau takin lo hawn zel a ni ang. Dikna kenkawh avanga tawrh a ngai a nih pawhin thangtharte tan kan tuar zel mai ang chu,” a ti.
Khuallian hian Remna Ni lawmnaah hian remna atana thawktu zinga mi, Rev. Dr C.L.Rema chu chawimawina a hlan a, a lawmpui thu sawiin, “He Remna Ni-ah hian remna siam tura ralthuam tunga lo pen chhuak MNF-te chungah lawmthu kan sawi a, lo pen chhuahna kawng lo sialsak a, lalthuthleng kiantu Pu Lal Thanhawla inpekna kha kan chawimawi nawn leh a, kohhran hruaitu te, MZP leh remna atana thawktu dang zawng zawngte kan chawimawi bawk a ni,” a ti.
Zirlaite chu Mizoram buai chanchin ziahna lehkhabu chhiar thin turin home minister hian a chah a, sorkar leh tlawmngai pawl chakna hmanga dan hneh a harsat thu leh inven dan tha ber chu mahni inven a nih thu a sawi bawk.
Ruihhlo ngawlvei tunlaiin Mizo thalai zingah an tam thu sawiin zirlaite chu ruihhlo laka inthiar fihlim a, tichhin hauh lo turin a chah bawk.
MZP Vice President Sanghmingthanga kaihhruai inkhawmah hian MZP President Dr. C.Lalremruata chuan Remna Ni chu Mizo mipuiten inremna aiin inhnialna chawkchhuaktu mai a ni dawna hriain MZP chuan kum 2017 khan hman a rel a, 2018 atanga hman tan a nih thu a sawi.
MZP president chuan Zofate chu khawvel ramri pathumin a daidang tih sawiin Mizoram tih loh chu buainain a chim mek tih a sawi a. “‘Unau kan Indo in tunge ding chhuak thei ang,’ kan zavai hian inrem takin awm ila, bil bil, bik bik awm loin rinawmna chibai inbuk tawna inrem turin a chah.
Remna Ni 2026 lawmnaah hian Rev. John. Raldosanga, Moderator Mizoram Synod chuan hunserh hmangin MZP General Secretary C. Lalhmingsanga’n Remna Ni lo hman tawh dan report a pe bawk.