Larsap General (Dr) Vijay Kumar Singh, PVSM, AVSM, YSM (Retd) chuan Mizoramin remna a neih chu mipuiten hluta chhawmnung zel turin a chah.
Thawhlehnia Remna Ni kum 40 tlin lawmna, Ruby Jubilee puala Zoram Research Foundation leh Aijal Club tangkawin BSI Hall, Khatla, Aizawla ‘From the Frontlines of ‘66 to 40 Years of Peace’ tih thupui hmanga hun an hman chu khuallian niin a hmanpui a. ‘The Case Study of the Enduring Legacy of the Mizo Peace Accord’ tih project a tlangzarh nghal bawk.
Larsap chuan Mizoram Peace Accord chu hmarchhak bakah khawvel puma ‘inremna thuthlung entawntlak’ tia hriat a nih thu sawiin mipuite chu hlut thiama chhawmnung zel turin a chah.
Underground-ten inremna hmanga mipui sorkar an zawm hnu kum 40 lai India-a state ralmuang ber zinga mi kan ni ta chu ropui a tih thu sawiin, remna leh muanna hnuaiah hian mipui sorkar leh hmasawnnate chak takin a kal thei thin tih a sawi.
Larsap Dr Singh-a chuan Mizoram inremna chu danglam bik leh chhinchhiah tlak a nih thu sawiin kum 40-na hmel a hmu leh ziah a nih hnuah Mizoramah engmah buaina a awm leh tawh ngai lo chu ropui a tih thu a sawi a. “Remna leh muanna a awm theih nan mi tinin tha an thawh avangin Mizoram mipui zawng zawngte ta a ni,” a ti.
Mizoramin thiamna leh theihna nasa tak a nei tih sawiin ram ralmuang leh zalen nihna chhawr tangkaia deuh deuh a pawimawh thu a sawi a, peace accord thil tum leh a hnutchhiahte chhawmnunga tihlawhtlingtu nih tum turin a chah bawk.
Remna Ni Ruby Jubilee pual hian StratNewsGlobal siam ‘Mizo Peace Accord Documentary Series’ thlir ho a ni a. Nitin A. Gokhale, journalist, conflict reporter & strategic analyst kawmna ngaihthlak a ni a. Sanjoy Hazarika, author & filmmaker-in thu a sawi bawk.
Chawhnuah ‘Frontlines of the Past: Conversation with Veteran Press Corp’ tih thupui hmangin C. Lalrosanga, IIS (Retd.), MP (Lok Sabha) hlui leh Doordarshan director general hlui; L.R. Sailo, Information & Public Relations Department director hlui; Lalramliani Hnamte, All India Radio announcer & newsreader thin leh D.R. Zirliana, Mizo Aw Daily Newspaper editor hluiten hun an hmang.