Al Hilal chuan Anfield a chhuahsan hnuah Liverpool forward hlui, Mohamed Salah chu an tlar hma tichak turin lak luh an tum.
Saudi Pro League club hian 2026 FIFA World Cup zawh hnuah an tlar hma tihchak an tum a, chutiang atan chuan Salah chu an thlang ber a. Kum 34 mi hi Liverpool-a kum riat a cham hnuah a contract hmang zovin man awm lova lak luh theih a nih tawh avangin Al Hilal hian sum sengso lovin an la lut thei dawn.
Saudi club hian Salah hi sum tam taka thlem an tum a, an contract hmachhawp pawh a theuneu lo viau a. Ruahmanna an siam dan chuan kum thum chhung atan contract an ziahpui ang a, he mi hun chhung hian Salah chuan € maktaduai 60 a hlawh ang a, season khatah € maktaduai 20 zel a hlawh dawn tihna a ni ang.
Inremnaah hian kum lina thlenga pawh sei theihna tur dah tel an rilruk a, chu chuan an pawisa hman tur zawng zawng hi € maktaduai 80 thlengin a tichho thei ang.
Salah hi Barcelona winger Raphinha aiin Al Hilal chuan an melh hmasa ta zawk a. Kum 2024 khan Brazilian forward hi an duh ber a lo ni tawh a, chutih lai chuan kum thum chhung atan € maktaduai 100 vel bawr hial theh chhuah an lo inhuam tawh a, tunah erawh an bansan ta deuh niin a ngaih theih a. Egyptian forward lamah an mit a fu ta rih a ni.