Atletico Madrid striker hlui, Luis Suarez-a chuan a club hlui hian tun dinhmuna an player pawimawh leh hlu ber pakhat, Julian Alvarez-a chu kum khat dang cham leh turin an thlem thlu thei dawn niin a ngai.
Alvarez-a hian tun nipui bazar inhawn mek chhung hian a hma lam hun chungchangah chanchin a ngah tawh hle a, Argentina forward hian Riyadh Air Metropolitano chhuahsan tumin hma a la mek nia sawi pawh a awm.
Kum 26 mi hian La Liga-a an elpui, Barcelona zawm a châk hle nia sawi a ni a, Real Madrid pawhin € maktaduai 150-in dawr tawh a; mahse, Atletico hian an lo hnawlsak tawh thung a ni.
Paris Saint-Germain leh Arsenal pawhin he forward hi an ngaihven ve niin thu thang a awm a; mahse, Atletico chuan Alvarez-a contract-a lei chhuak duh tan € maktaduai 500 sen ngaia release clause a neih mek chu hmachhuanin dan an tum tlat a ni.
Alvarez-a hian Los Colchoneros tan vawi 106 a khel tawhah goal 49 a thun tawh a, a khelhpuite thun tur vawi 66 a siamsak tawh bawk a. A luh tirh atangin ani aia an club-a goal thun tam leh thiante tana goal siamsak tam an awm lo a ni
Atletico nena kum 2020-21-a LaLiga nomawi lo la tawh, Suarez-a chuan Liverpool-a a awm lai khan hetiang dinhmun chiah hi a lo hmachhawn ve tawh thu a sawi a. Kum 2013 khan cham rih turin an lo thlem thlu tawh a, kum khat hnuah Barcelona a zawm zui ta a ni.
“Liverpool-ah khan ka chungah hetiang chiah hi a thleng a. Arsenal zawm ka duh thu ka sawi a, mahse, kan captain Steven Gerrard-a’n ka cham rih ngei a ngaih thu min rawn hrilh a, min thlem thlu ta a ni,” tiin Suarez chuan a sawi.
“Kum tha tak ka hman chuan Barcelona emaw, Real Madrid emaw, Bayern Munich emaw, ka duh duhna zawm thei turin min puih tur thu min hrilh a. Min thlem thlu ta nge nge a. Ka thil sawite kha pawi ka tih thu ka sawi a, Liverpool tan theihtawp ka chhuah ta a, vawi thum chauh ka khelh hnuah min hmangaih zui leh nghal mai a, ka tana an club-a ka season hman tha ber a ni zui ta a ni,” tiin Uruguayan striker hlui hian a sawi.
Manchester City atanga Span pan ta, Alvarez-a hi US, Mexico leh Canada-in an thlen mek World Cup-ah Argentina chu knockoput round hmasa ber a luhpui tawh a; amaherawhchu, a khel tam vak rih lo thung.