Ivory Coast-ah tui lian vangin mi 59 thi an awm tawh niin sorkar thupuangtuin a sawi.
Thuneitute chuan chin hriat lohte zawn chhunzawm zel a nih avangin thi zat hi a pung ang tih an hlau hle niin Amadou Coulibaly-a chuan a sawi.
Inrinni atanga ni eng emaw zat ruah tam tak sur hnuah tui lian leh lei min nasa tak a awm a. Thi zinga thenkhat chu Ivory Coast-a sumdawnna khawpui, Abidjan-a Attecoube leh Yopougon municipality-a mite an nih thu National Cohesion Minister Myss Belmonde Dogo chuan a sawi.
An thenawma Ghana-ah pawh ruah a sur nasa hle a. An khawpui, Accra telin ram chhung hmun zau tak chu tuiin a chim a, mi 12 an thi tawh.
Thawhtanni atang khan khawpui chhunga in leh kawngpui chu tuiin a chim tan a, Accra chhunga hmun eng emaw zat leh a bula Tema khawpui chu tlawhpawh hleihtheih a ni lo.
Thi zingah hian nu leh a fa pawh an tel a, an pahnih hian Achimota-Agbogbloshie district-ah tuiin a len bo niin Ghanaian national fire service thupuangtu, Alex King Nartey-a chuan a sawi.
Accra tui lian video darhah chuan mite chu nghawng thleng chim phak tui tlingte an hleuh vaa, an thenawm hnaia tangte chhanchhuah tumin an bei a, tui lianin a chimna kawngpuiah lirthei eng emaw zat kalsan a ni bawk tih a lang.
Puih ngaia awmte tlawhpawh theih loh chu tanpuina pekna kawngah ‘harsatna lian tak’ a nih thu fire service thupuangtu chuan a sawi a. Nilaini pawh khan veng eng emaw zat chu tuiin a la chim a ni.
Ghana-a national disaster management organization chuan Thawhtanni zing dar 07:00 vel atang khan khan emergency call an dawn tan thu sawiin miin an chenna inah tui tui a lut tan tih an sawi hlawm tih an sawi.
Disaster agency-a mi, Mariam Dongyela Millah chuan, “Hmun zawng zawng tuiin a chim a, a hlauhawm hle a ni,” a ti.
Ghana meteorological agency chuan tun kar chhung hian Accra-ah ruah tam zawk a la sur dawn tih sawiin tual chhung mite chu inbuatsaih turin an ngen.