Aizawl: Chief Minister Lalduhoma’n Foreign Contribution Regulation Act (FCRA) chungchanga Parliament-a dan siam danglam tum mek Kristian mipuite tana a that lohnate Union Home Minister Amit Shah hmua a thlenna leh hmalakna hlawhtling taka a neih avangin ZPM Media & Publicity Department chuan tawlhlohpuan an bahtir.
Chief minister hi New Delhi atanga a lo haw hnuin Inrinni tlai dar 3 khan Assembly House Recess Room-ah ZPM Media & Publicity Department hian tawlhlohpuan hi an lo bahtir a ni.
ZPM Media & Publicity Dept. Chairman B. Lalchhanzova, minister ni bawk chuan, “Kan chief minister hi vawiinah a lo haw dawn avangin MNF unauten a Bangla gate bulah pawndum nen an lo nghak a, keini pawhin tawlhlohpuan hlan tumin kan ngaichang bawk. Mahse, chawlhkar kalta lama a programme tihfel tawh avangin MLA Conference Hall lamah Social Welfare, Women & CDD huaihawtin ‘Bana kaih CM Special Programme’ leh Certificate leh GIA to Accredited Drugs Treatment Certificate semnaah khuallian a a hman avangin kan pan chilh ta a ni,” a ti.
B. Lalchhanzova sawi danin August 6 khan Chief Minister Lalduhoma, Council of Churches in Mizoram (CCM) General Secretary Rev. Lalhmangaiha leh Mizoram Kohhran Hruaitute Committee (MKHC) Secretary Rev. Lallawmthanga te chuan New Delhi kalin Parliament House-ah union home minister an hmu a. Mizoram tana FCRA a him tawk lohnate thlenin memorandum an thehlut.
Hemi chungchangah hian Shah chuan an thil thlen pawimawh tak ‘Retrospective’ FCRA awm hma leh a bawra registration-te an tihtel loh thute sawiin parliament thutkhawm neih hmain an thu thlen dangte a lo zirchiang dawn tih a lo hrilh bawk a. Kristiante hlauhthawn zawnga FCRA siam tumna a awm meka chief minister leh kohhran hruaitute hmalakna chu fakawm leh ropui tak a nih thu B. Lalchhanzova chuan a sawi bawk.