Aizawl: Ex-MP (RS) K. Vanlalvena chuan Thawhtanni khan MNF Hnam Runa inkhawm neihah thu sawiin India leh MNF inremna thuthlung (Mizoram Accord) hi Mizo pasalthaten ralthuam leh thisen zawm chunga an siam a nih avangin an remtihna lova thiah emaw, paihbo emaw a nih chuan an ralthuam leh thisente an pek let a tul ang tiin a sawi.
Mizoram Autonomous District Council te chauh Tribal Area anga chief minister Lalduhoma’n a sawi chu thudik lo a nih thu sawiin, Indian Constitution Article 342-ah Mizo te an tel a, Article 371(G) hnuaiah pawh hnam dangten hmun lo ram an neih theih lohna tur danah a awm tlat avangin hlauhthawn tur a awm lo tih a sawi bawk.
K Vanlalvena chuan Inner Line Permit (ILP) pawh Article 19(5) behchhana tribal te humhim nana hman leh Mizoram Accord-a nemngheh tlat a nih thu sawiin, dawih aw chhuah lova a nghet zia hriat a that thu a sawi a. MNF chu Mizoram mipuite aiawh phak liau liau a nihzia leh accord hi a hun laia Mizoram sorkar aiawhte nen ngeia hming an sign a nih thu sawiin, Chief Minister Lalduhoma’n thu dik lo hmanga mipuite bum a tum tih sawiin, “Kan chief minister hian a sawi loh tawp tur a sawi a ni,” a ti.
ZPM sorkar kal zelah mipuite rilru beidawng a insyak mek nia sawiin, MNF chu sorkar khalh ngil tur leh ram leh hnam humhim kawnga hma la zui zel turin party mipuite insangmar turin a fuih nghal bawk.