Aizawl: Foreign Contribution Regulation (Amendment) Bill, 2026 chungchanga Chief Minister Lalduhoma hmalaknaah Mizoram kohhran hruaitute an lawm hle tih ZPM Vice President C. Lalnunnema chuan a sawi.
Thawhtannia ZPM General Headquarters-a chhung inkhawm neihah C. Lalnunnema chuan thu sawiin, July 3-a PAC meeting-in FCRA zir chiangtu team a din hnuah chief minister hova joint meeting neih a nih thu leh August 6 khan chief minister leh kohhran hruaitu (CCM leh MKHC) ten New Delhi-ah Union Home Minister Amit Shah hmuin memorandum an thehlut tih a sawi.
FCRA bill siam that proposal chungchang sawiin C. Lalnunnema chuan, FCRA hi siam that a nih loh chuan Mizoram MP-te pawhin parliament-ah he bill hi an pass-pui dawn lo tih leh Kristian Organisation-te tana ngaimawhawm lai siam tha tura hmalak a nih thu a sawi.
Council of Churches in Mizoram (CCM) General Secretary Rev. Dr. Lalhmangaiha nen an inbiakna sawiin, sorkar hmalaknaah Kohhran hruaitute an lawm a, Thawhlehnia kawngzawh tur pawh hmalakna a hlawhtlin theih nana kalpui tur a nih thu a sawi bawk.
MNF returnee-te tana Maumual rama in hmun lo ram kum tam tak chin fel loh chu ZPM sorkar chuan hun rei lo te chhungin a ching fel ta tih sawiin ZPM chuan zalenna sualtute a theihnghilh dawn lo tih a sawi bawk.