Aizawl: Minister B. Lalchhanzova, Aizawl East II bialtu MLA ni bawk hovin a pisaah UD&PA hotute leh Dawrpui khawtlang hruaituten Aizawl Lammual chei that tura hmalakna kal mek chungchang leh Dawrpui veng chhung nghawng thil tulte an sawi ho.
Assam Rifles-in an chhuahsan hnua Lammual chei that dan tur Master Plan siamah, Dawrpui Local Council, MHIP leh YMA-te hmunhma neih mekna Bazar Bungkawna mi chu ‘Aizawl Square’ area ni tura ruahman a nih avangin khawih danglam a ni dawn a. Sorkarin ruahmanna a siam sak dante sawiho turin an thukhawm a ni.
Minister B. Lalchhanzova chuan, “Aizawl khawpui laili lai hmelhmang tihdanglam a nih dawn avangin heng hmalaknate hi Lammual Beautification nena kalkawp tur a ni a; an hmunhmate chu cheimawiin, khawpui faina leh cheimawina ngaih pawimawh a ni dawn a ni,” a ti.
Dawrpui Veng chu Aizawl khawpui laili leh langsar laia awm a nih avangin mawi taka chei a nih tur thu a sawi a, a enkawl kawngah pawh Dawrpui khawtlangte chu theihtawp chhuah zui turin a chah bawk.
Dawrpui khawtlang hruaitute chuan an bialtu MLA-in thahnem a ngaihpuinaah lawmthu an sawi a. An khawtlang ram huam chhunga sorkarin a khawih danglam turah compensatory fund pe mai lo a, an ram neih ang an humhim theih nan leh building thar tha tak tak sak nan hmalak a nih dawn avangin lawmthu an sawi. Chief Minister Lalduhoma leh UD&PA Minister K. Sapdanga-ten an ruahman pui a nih avangin an chungah pawh lawmthu an sawi a ni.
Thutkhawmah hian Aizawl Square-in a huam chin, Dawrpui Veng hmun thenkhat chei thatna tur Plan chu presentation hmanga thlirho niin, zawhna leh chhanna hun hman a ni a. Building awmsa thiah turah hian mi mal ram pali leh pawl hminga ram awm pathum a tel a ni.