Aizawl: Clinical Establishment Act kengkawhtu, Aizawl District Registering Authority thuchhuak angin Thawhlehni khan Aizawl district tana ruat inspection team chuan day care centre pathum tlawhin an en fiah.
Inspection team-ten an tlawhte hi Trinity Day Care Centre, AR Day Care Centre leh Zote Day Care Centre-te an ni a, Thawhtanni khan hmun li an lo tlawh tawh bawk.
Heng Day Care Centre-ah hian a hmunah an hnathawh dan, hmanraw hman, hnathawktute thawh dan, bawlhhlawh sawngbawl dan leh an building-te Inspection Team-te hian an enfiah a. Mipui tana him lo leh hriselna khawih pawi thei a awm chuan dan anga hmalak zel tura tih a ni.
Clinical Establishment Act hi Central Act, Mizoramin a hman tura duan a ni a. He Act hian Clinical Establishment zawng zawng, damlote damdawi leh investigation hmanga enkawlna hmun — Hospital, Clinic, Dental Clinic, Laboratory, Imaging Centre leh inenkawlna hmun hrang hrangte a huam a ni.
He Act bawk hian Day Care Centre hrang hrangte inkhuahkhirhna dan siamin, an inziah luhna (register) tur a siamsak bawk.
Clinical Establishment Act hi mipui thatna tur leh inenkawlna changtlung zawk neih theihna tura ruahman a nih angin, harsatna tawk emaw lungawilohna nei chuan Convener, District Registering Authority, Chief Medical Officer Office, Aizawl West-ah ziakin a thehluh theih a ni.
Inspection Team-ah hian District Magistrate aiawh, AMC aiawh, SP Office aiawh leh Health Department aiawh-te an tel a ni.