All India Football Federation (AIFF) President Kalyan Chaubey-a chuan Tata Group hnenah Indian Super League (ISL) atanga Jamshedpur FC inhnukdawk tura thutlukna an siam tawh chu ennawn leh turin a ngen a, India football hmasawnna tura Tata-in sulhnu an lo neih tawhte chu a sawi chhuak.
Tata Group chuan ISL atanga JFC inhnuhdawhna hi rei tak atanga mumal taka an lo ruahman tawh, football atanga an thil tum ber, a zung atanga infiamna tihpuitlinna lama kir leh nan a ni tih an nenghet a. Tata Steel Vice President D.B. Sundara Ramam-a pawhin thutlukna hi ISL hmachhawn mek tur nen inzawmna a neih loh thu a sawi a, thutlukna hi sawh sawn a nih loh tur thu a sawi bawk.
Chaubey-a chuan AIFF-in Tata Group thutlukna chu an ennawn leh an la beisei tlat a ni tih sawiin, “Tata hian football-ah, a bik takin senior football dinhmun sang ber vawn him kawnga min pui thei a nih chuan AIFF kan lawm hle ang. AIFF ngenna hian an rilru a thlaktir thei a nih chuan player leh football hmakhua atan Tata hi senior football league-ah hian a awm chhunzawm ngei kan ngen duh a. AIFF chuan an hnen atanga rawtna reng reng kan lo lawm a, a tha ber thleng turin rawtna hrang hrangte zawm zui kan inpeih reng a ni,” a ti.
Tata Steel chuan JFC hian player-te nen inremna an lo neih tawhte chu zahsakin club thar zawnah pawh an pui dawn tih an sawi tawh a; mahse, AIFF president chuan Tata Group lakah rinna a la nei a, an thutluknate hi sum enkawlna vang mai a ni thei lo tiin a sawi.
“Hetianga thutlukna an siam chhan hrang hrang a awm ka ring a; mahse, tel man Rs vaibelchhe 1.1 emaw, management fee vang emaw chu a ni thei lo. Board-in league sang ber atanga senior team hnuhdawh an tum hian hetiang thutlukna an siam chhan hi pawimawh tak a ni ngei ang. Football fan-te duh dan pawh an hria a; mahse, he thutlukna hi sum leh pai vang chu a ni thei lo ang. Tata hian sumdawnna lian tam tak an nei tlat a ni,” tiin a sawi.
Chaubey-a chuan kum 1987 atanga vawiin thlenga la awm zui zel, Tata Football Academy hmanga he infiamna hmasawnna tura an thawhna a zah hle tih a sawi a. “Kum eng emaw zat liam taah khan corporate tam tak rawn langsar em em kan hmu a; mahse, chumi hnuah muang changa sum neih tawh loh vanga tlachhiate pawh kan hmu a. Tata chu an danglam bik hle a, India mite zingah hian zah an phu a, zahna pawh an dawng reng a ni,” a ti.
“Tata hian infiamna hi sumdawnna, sum hnar, hlep emaw, hlawkna emaw atan ngawr ngawr an thlir ngai lo ang. India infiamna tan hian thil tam tak an lo ti tawh a. Thalkah leh hmun dang tam takah pawh sum an seng nasa a, football-ah phei chuan youth development system tam zawk hi Tata Football Academy atanga lo chhuak an ni tih ka hria,” tiin AIFF President Chaubey-a chuan a sawi belh a ni.