Gulf-a indona titawp tura inremna siam tumnaah Iran leh US thu a la inhmu thei lo niin Iranian sorkar hotuin a sawi a, June thlaa inremna lailawk an siam tawh pawh tinung thar leh tura inbiaknain hma a sawn lo tih a sawi bawk.
US President Donald Trump-a’n Iranian hruaitute a vau thar lehin hei hian buaina chin fel beiseiawmna a tichhiat lehzual mek laiin he thu hi sawi chhuah a ni.
June thlaa inremna an siamah khan ‘kil hrang hranga sipai chetna tihtawp vek’ tura puan a ni a; mahse, rang taka tawpin Trump-a chuan July 7 khan ‘a tawp’ tih a sawi a, Iranian foreign ministry pawhin a hnu chawlhkar khatah ‘hman rih loh’ a nih thu a puang zui.
US chuan Iran-in Strait of Hormuz hawn lehna tura inremna a zawm lo niin a puh a. Tehran pawhin Washington hian a thutiamte chu a phatsan niin a sawi ve bawk a, Iran lawng chawlhhmun a kharte hawn leh Iran thil neih a khuahkhirh hlip tura a intiamna a ti lo niin a sawi.
Iranian hotu pakhat chuan, “Palaite kaltlanga sawiho mek pakhat chu US-in inremna lailawk siamah kir leha thutiamte tihhlawhtlinna tur hun bituk a siam chungchang a ni a, hmasawnna erawh a awm lo tak zet,” a ti.
Trump-a chuan Nilaini khan US-in Strait of Hormuz chu ‘a thunun vek’ tih a sawi a, hetih lai hian Iran-in tuipui enkawl tura a din, Persian Gulf Strait Authority chuan khar zel a ni tih sawiin Iran duh dan tihhlawhtlin a nih hma chu hawn a nih loh tur thu a sawi.
February 28-a US leh Israel tang dunin Iran an beih hnuah mi sang tam tak an thi tawh a, a tam ber hi Iran leh Lebanon-ah a ni.
Iran chuan chhan let nan an chhehvel ram hrang hrang – Oman, Jordan, Kuwait, Israel, United Arab Emirates leh Saudi Arabia-a US hmunhmate a bei ve bawk.
June thlaa inremna an siamah khan ni 60 chhungin indo tihtawp hlenna tura inbiak te, nuclear programme-a indawr leh US-in Tehran a hrekna hlih te pawh a tel a; mahse, a hnu lawkah inkap tawn leh zuiin indawrna awm thin mah se rah tha a la chhuah leh rih lo.