Shiromani Akali Dal chief Sukhbir Singh Badal-a chu Ningani khan Maharashtra-a Nanded-ah mi pakhatin a bei a, a kut a kak.
Khawpuia mi mal damdawi inah dah luh nghal a ni a, doctor-te chuan a hlauhthawnawm loh thu an sawi a. Hliam hi cm 4-5 vela sei niin Nanded collector chuan a sawi.
Badal-a hian Nilaini zan khan Nanded a thleng a. Ningani khan a chhungte nen gurdwara-ah an kal a, pawikhawihna hi Mata Sahib gurdwara an tlawh hnu lawka thleng a ni.
Nihang Sikh pakhat, Jaspal Singh tia hriat chuan Punjab deputy chief minister hlui hi kirpan nge dagger tih hriat chian loh hmangin vih a tum nia sawi a ni a. Nihang-te hi Sikh hnam pakhat an ni a. Venhim hna thawktu pakhat chu pawikhawihtu leh Badal-a inkarah tlazep nghalin Badal-a kut a hliam a, vengtu hi a na ta zawk a ni.
Pawikhawihtu hi Pune atanga dan zir chhuak niin kum engemaw zat kalta atang khan Nihang a ni tih sawi a ni.
A hnua video tihchhuahah chuan Badal-a hi a kut ding lam hliam puana khuh chunga a kal lai a lang a. Pawikhawihna thlen lai hian a nupui leh Akali Dal MP, Harsimrat Kaur Badal-i pawh a bulah a awm.
Nihang hian Badal-a hi a puma vih a tum nia hriat a ni a, a vengtu rang taka a chet nghal avangin Akali Dal hruaitu hian hliam na a tuar ta lo hlauh nia ngaih a ni.
Pawikhawihtu hi man a ni a. Police-te chuan CCTV footage-ah thil thlen dan an enfiah zui nghal bawk.
Badal-a hi a lakah pawikhawihna thleng thei a nih avangin sorkar chuan venhimna sang ber chi, Z-plus security huangah a dah a. Mi mal thila zin chhuak ni mah se venhimna erawh khauh taka kalpui reng a ni.
Maharashtra Chief Minister Devendra Fadnavis-a chuan pawikhawihna thleng hi chhui chian turin thupek a chhuah nghal.
Prime Minister Narendra Modi-a pawhin Badal-a dinhmun zawtin phone-in a nupui, Harsimrat Kaur-i a be tawh bawk.
Akali Dal hruaitu, Virsa Singh Valtoha chuan an party hotu beihna chu na takin a dem thu a sawi a. “Kim taka chhui chian a ngai a. Hetiang beihna siamtu chakna hi tute nge ni?” a ti.