MZP in MPSC pisa kai tur an dan chu nilaini tlai khan an titawp a, sorkar lam atanga an duhnate tihlawhtling tura Reform Committee din a nih tak vang niin an sawi.
Nilainia sorkar lam aiawhte leh MZP te inbiaknaah MPSC Reform Committee din nise an ti a, Reform Committee-ah hian DP&AR Secretary chu Chairman niin, Member Secretary ah DP&AR joint secretary a awm bawk.
Member dangte hi MPSC Secretary, Law & Judicial Addl. Secretary, GAD Addl. Secretary, Home Addl. Secretary leh Finance Addl. Secretary te an ni a, anni hian a tul angin a kaihhnawih officer dang emaw hetiang lama mi thiam bikte emaw an ruat belh thei dawn a ni.
Hetia en mai chuan an tha the thaw viau mai a, zirlaite leh hna dil beidawng tawhte rinngamna tur an relchhuah ngei pawh beisei ila, anni lam pawh fimkhur takin kal mawlh teh se.
Chutihrual chuan service inrual, intan rual tlang thah, mipuite tana ke pen thin an ni hlawm a, department pakhata an service pui tihhmingchhiat emaw, lo dik lo deuh pawh awm se puanzar dum dum erawh an hreh dawn tih a hriat a, an thurela beiseina sang tak lo neitute hi min khaldai leh raih lovang tih a sawi theih loh bawk.
Engpawhnise, MPSC tha zawk a chhuah theih nan beiseina nen mipuiin an thlir tih hria se la, thu ropui leh a tha lama hriatreng tur lo relchhuak mawlh teh se.