US leh Israel tang dunin Iran an beih avanga ni tin mamawh tuialhthei phurhnaa harsatna a awm mek karah India chuan ei rawng bawlna gas a chatlak loh nan sorkar leh mi mala thlifimtute chu siam chhuah zat tur bi a tuksak.
Ningania hriattirna a tihchhuahah Indian sorkar hian ei rawngbawlna gas chu ni khatah a tam thei ang ber siam chhuaka metric ton 63,810 tal puitlin zel turin a ti a ni.
Company-te chu liquefied petroleum gas (LPG) bik a dahthatna leh a phurh kualna tha a awm reng theihna tura hma la turin a ti a. Rel emaw, lirthei hmang emaw pawha a tul anga phura mamawh khawpa tam a awm theihna turin tan tan la turin a ti.
Sorkar laipui hian January leh July thla chu siam chhuah zat tar langin siam belh a ni a, thlifimtute chu siam tam deuh deuh turin a ti a ni.
India hian ei rawngbawlna gas a mamawh zawng zawng zinga 90% chuang hi Middle East atanga a lak luh a ni thin a, indona avanga Iran-a buaina a chhuah hnuah March atanga Strait of Hormuz khar a nih khan a buai phah hle.
India hian mi mala thlifimtu lian, Reliance Industries Ltd chu in chhunga hman tur bik buatsaih kawnga hma la tura tiin ni tin LPG 18,000 siam chhuak turin a ti.
Sorkar hnuaia awm, Oil & Natural Gas Corp (ONGC) leh Oil India Ltd (OIL) leh gas utility Gail India Ltd rte pawh ram pumin ni khata siam chhuah a tum zat 10% tum turin a ti bawk.