Fei (javelin) khawh thiam Neeraj Chopra, badminton star Pullela Gopichand leh AISTS India chuan Ninganiah khan India-a infiamna lama coach-te theihna tihhmasawnna leh sports kaihhnawih dinhmun siam thatna tur, Indian School of Coaching Excellence (ISCE) an hawng.
ISCE hian thiamna hrang hrang awm khawm coach-development programme hmanga khawvel hriat tham coach chher chhuah a tum dawn a ni.
Heng programme-ah hian physical literacy, sports science, sports education, technology leh career development te fawm khawm a ni ang a, infiamna sang zawk tana mamawh thiamna leh hriatna hmangin coach te a thuam ang.
“ISCE hi tangruala thiamna inhlanchhawnna hmunpui a ni ang a, sorkar, SAI, sports federation, association, high-performance centre, academic institution leh private sector te nen thawkhoin India puma coaching tha siam chhuak turin hma a la dawn a ni,” tiin thuchhuah chuan a tar lang.
Glasgow-a Commonwealth Games neih zawh taka silver medal latu, Chopra chuan infiam mite hlawhtlinna kawngah an coach-te chu a pawimawh ber an nih thu sawiin ram chhungah coach tha chher chhuahna tur hmunhma nghet leh tha tak din a tul thu a sawi.
“Infiam mi tinte kal zelna tur hi an coach-te kaihhruainaah a innghat tlat a, infiam mi an nihna chauh ni loin mi mal puitling an nihna kawngah pawh a pawimawh telin ka hria. Chuvangin, India-a infiam mi ropui lo la piang zel turte siam chhuak turin kan coach-te hian khawvel huapa zirna, kaihhruaina leh sports science leh infiammi tihhmasawnna atana hriatna thar ber ber an dawn hi a pawimawh em em a ni,” a ti.
“ISCE hmang hian Neeraj Chopra Foundation chuan coach-te tana inzir zel theihna tur te, thiamna an tihzauh zel theihna tur leh infiammite entawn tlaka an hruai theihna tur hmunhma siamsak a beisei a ni,” a ti bawk.
Dronacharya Award leh International Olympic Committee-a coaching excellence citation dawngtu, Gopichand-a pawhin ISCE chuan khawvel thiamna la lutin Indian coach-te an theihna tipung turin a pui dawn tih a sawi.
“India infiamna hmabak chu kan thil din tharah hian a innghat dawn a. Coach-te hi a laipui ber an ni a. ISCE hi khawvel puma kalphung tha berte leh India-a kan tawnhriatte belhkhawma coach-te tana inzir theihna, thawhho thiamna leh inrintawkna nena hma an lak theihna tura ruahmanna kan siam a ni a. He hmalakna hian Indian sport bung thar siamna kawngah awmzia a nei thui dawn hle tih kan ring,” tiin Olympic medallist Saina Nehwal, PV Sindhu leh mipa world No.1 hlui, Kidambi Srikanth te lo zirtir tawhtu Gopichand-a chuan a sawi bawk.
“ISCE tum ber chu coaching ecosystem nghet tak siam a ni a, hei hi khawvel huapa India-in rei tak hlawhtlinna tluantling a neih theih nan a pawimawh em em a ni a. Khawvel puma infiamna lama ram ropui ni tura kan intintuah mek lai hian kan hlawhtlinna hi champion kan neih atang chauh ni loin he hmunhma kan siamah pawh hian teh a ni dawn a ni,” tiin thuchhuah chuan a tar lang.
“ISCE rawn piang ta hi infiam mi tha apiangin coach tha an phu a, coach tha apiangin khawvel puma thiamna, kaihhruaina leh hun tha an phu tih rinna vang a ni,” tiin a tar lang tel bawk.