Aizawl: BJP Mizoram State Office, Mipui Run, Upper Republic-a Thawhtannia Karthar Inhlanna leh Political Session neihah, State Vice President JB Rualchhinga chuan history-ah pawh inlungrual lohna leh zirtirna dik lo avangin thisen chhuahna nasa tak a lo thleng tawh a, Mizoramah pawh mipuite hnenah zirtirna dik tak pek leh mahni hamthatna tura thu dik tawk lo hmanga thusawi sim a tul tih a sawi.
JB Rualchhinga chuan England-a ‘War of Roses’ leh India rama sakhuana kalsual avanga thil thleng rapthlakte sawiin, kohhran hruaitute leh politician-ten Kristian an nih anga dik tak leh fel taka hma an lak a ngai tih sawiin, “Mizoramah pawh sakhuana kal sual, zirtirna dik lo hi a hlauhawm hle a, kohhran hruaitute leh politician-te pawhin mahni hamthatna tur a nih dawn avanga thu dik tawk lo hmanga thusawi kan sim a ngai a, Kristian kan nih anga kan hnathawhna hmun hrang hrangah pawh dik tak leh fel taka kan tih a ngai a ni,” a ti.
Tun hnaia FCRA chungchanga Union Home Minister Amit Shah leh Catholic Bishop Conference of India (CBCI) hruaitute inhmukhawmna sawiin, Kristianten harsatna an tawha thuneituten chak taka hma an lak theih nana FIR thehlut uar tura Amit Shah-a’n ngenna a lo siam chu thil lawmawm tak leh BJP chu Kristian dotu a nih loh zia lantirtu a ni tih sawiin, state pawna rawngbawltute pawh harsatna an tawh hunah rang taka FIR thehlut thin turin a chah bawk.