Aizawl: August 20, 2026-a Bungkawn Local Council By-Election awm turah ZPM chuan Thawhtanni zing dar 7 khan Bungkawn Venglaiah Street Campaign neiin, Minister leh ZPM Media Chairman B. Lalchhanzova chuan ram teh kawngah ‘first come, first serve’ kalpui a nih tawh thu leh thiltithei zawkten dilna thehlut hmasate an hmakhalh tawh loh thu a sawi.
Street Campaign Bungkawn MPF Local Forum President Upa Lalthanchhunga kaihhruaiah hian B. Lalchhanzova chuan Local Council-te chu mi mal thil ni lova khawtlang pawimawh buaipuitu an nih avangin sawi nep chi an nih loh thu leh mipui rawngbawltu dik tak an nih angin biak nuam leh chhawnchhaih nuam an nih a tul thu a sawi.
Minister hian LR&S Department-a hmalakna thar sawiin, May thla atang khan ram teh kawngah ‘first come, first serve’ kalpui a nih tawh thu leh thiltithei zawkte’n dilna thehlut hmasate an hmakhalh tawh loh thu a sawi a; Bungkawn Local Council paruk awm mekah ZPM sorkar nghet tak tha tichak zual turin candidate Malsawmhriatzuala vote turin a ngen.
He By-Election hi Bungkawn Local Council Chairman ni lai VL Zamlova chu AMC-a ZPM Corporator a nih taka hmun awl hnawhkhat tura neih tur a ni.