Aizawl: Education Minister Dr Vanlalthlana chuan Mizoram College of Nursing (MCON) Hall, Falkawnah nurse-te tana buatsaih State level workshop ‘Clinical Skills and Competency for Nursing Managers’ chu Thawhtanni khan a hawng a. Damlote enkawlna kawngah nurse-te hlutzia sawiin mi dangte tana inpekna a nih avangin an hna chu Mizo nun ze mawi, ‘tlawmngaihna’ nen a inhmeh em em a ni tih a sawi.
Minister chuan nurse manager-te chu clinic leh ward-a an mawhphurhna bakah an hnuaia thawktuten ngilneihna nen damlo an enkawl theih nana zirtirtu leh hmahruaitu pawimawh tak an nih thu a sawi a. Tunlai thiamna leh hmanrua thang zelah damlote enkawlna kawngah pawh intuaithar zel leh inzir reng a tul thu sawiin, anmahni chauh ni lo an thawhpuite leh an hnuaia thawktuten hma an sawn ve zel nana workshop hi hmang tangkai turin a chah bawk.
He hunah hian Khualzahawm Prof. K. Robin, Director, MMTTC, Mizoram University pawhin thu sawiin indaih lohna karah pawh zan tam tlaivara damlote tana inpe thin nurse-te chu Mizoram mipuite hriselna kawngah an mawhphurhna a sang hle a ni, a ti a, intuaitharna hun tha tak an neih chu hlawk taka hmang turin a chah.
Continuing Nursing Education (CNE) Chairman Esther Lalruatmawii kaihhruai he programme-ah hian ZMC&H Nursing Superintendent Laltlanpuii’n lawmthu sawina a hmang a ni.
Workshop hi Multi-Modal Training & Teaching Centre (MMTTC), MZU leh CNE, ZMC&H te tangkawp buatsaih hi August 22, 2026 thleng neih tur niin Mizoram chhung hmun hrang hrang atangin sorkar leh private damdawi ina thawk nurse manager eng emaw zat an tel a ni.