Aizawl: Chief Minister Lalduhoma chuan amah pawhin a awih loh tawp tur thu atthlak leh mak pui pui sawiin, tun hmaa a thusawi thin letling thawkin a sawi a; a bikin Gen Z-te ngaihtuahna hruai kawi tumin nasa takin a hmanhlel niin MNF Legal Board vice chairman, general secretary ni bawk, Lalpianfela Chawngthu chuan MNF Hnam Run-a chhung inkhawm neihah Thawhtanni khan a sawi.
Lalpianfela Chawngthu chuan chief minister chu an party chhungkaw boruak chhe tak leh sorkar eirukna thubuai lian tak — Lengpui ram hralh chungchanga mipui rilru hruai kawi nan amah pawhin a awih loh tur thu sawiin a hmanhlel mek tih a sawi.
“ILP, Article 371G leh Mizoram Peace Accord chungchangah MNF dah hniam tum ranin khang lai hun hre phak lo Gen Z-te ngaihtuahna hruai kawih a tum hi a pawi takzet a. Ngaihdam dil se, duhtawk tawh se ama zahawm nan pawh a tha ang,” a ti.
MNF Legal Board vice chairman chuan Mizoramin Human Rights Commission hlau leh a awmzia pawh man lo chief minister an nei hi a pawi hle tih a sawi a. English-ho chuan kum 1215 daih tawh khan Rule of Law — Lal meuh pawh dan rorelna chungah a awm thei lo tih an lo buaipui tawh a, kum 800 chuang a ral tawh hnu kum 2026-ah pawh Mizoram chief minister leh law minister ni bawk phei chuan dan piah lama chetna (mob rule) la duh zawk niawm taka thu a la sawi hi a zahthlak hle tia sawiin, “Kan law minister hi ‘law minister’ ni tlak a ni lo va, ‘low minister’ a lo ni zawk tih a lang chiang hle,” a ti bawk.
Gen Z-te chungchang sawi zuiin, “Gen Z-te hi nakkin lawka kan ram hruaitu tur an ni a, dikna duh leh corruption duh lo an ni. Anni ang kumah hian kan Hnam Pa Laldenga leh a thawhpuite khan Mizoram tan zalenna an lo sual tawh a. Chuvangin politics khawvela awm mekte hian an beisei ang taka ram kan kaihhruai a ngai a ni,” tiin a sawi.