Aizawl: Mizoram mipuite eirawngbawlna gas harsatna tihziawmna tur leh awlsam zawka gas lei theih nan Supply Minister B. Lalchhanzova chuan Thawhlehni khan State Guest House, Chaltlang-ah Indane EXTRALITE NOW Free Trade LPG Cylinder (FTC) chu mipui hman theih turin a tlangzarh.
He hunah hian Minister chuan Indian Oil Corporation Limited (IOCL)-in englai pawha lei theih tura gas cylinder thar an chhawp chhuak chu lawmawm a tih thu sawiin, dan lo (black)-a gas lei tam thin lutuk a tihziawm a beisei thu leh he gas hi sorkar subsidy pekah tel lova lei tur a nih avangin a man pawh market base-a a leitute mamawh ang zela chhawp chhuah a nih tur thu a sawi.
Gas thar hian sorkarin IOCL atanga gas cylinder a hmuh thin zat a kiam phah dawn lo va, Mualkhang Gas Bottling Plant pawh ni khata gas bur 8,000 zet siam chhuak thei tura buaipui mek a nih bakah, Mizorama Energy Security a awm theih nan Oil Depot bun tuma hma lak mek zel a nih thu Minister chuan a sawi bawk.
Indane EXTRALITE NOW FTC gas cylinder hi 10 kg composite cylinder (fiber glass) hmanga siam a ni a. Gas cylinder pangngai aiin a zang a, tuiek ve lo tur leh kangmei laka him zawk tura siam niin, a chhung lang tlang thei a nih avangin gas awm zat leh refill hun tur awlsam takin a hriat theih dawn a ni.
He gas hi vawikhat in-register nan Rs 4,900 vel leh a refill nan Rs 1,800 vel ruahman niin, IndianOil ONE App leh Customer Website kaltlangin a in-register/refill theih a, tun dinhmunah MIZOFED leh Vanbuangi Agency-ten an pe chhuak tan dawn a ni.