Aizawl: Chief Minister Lalduhoma chuan Mizo leh Gorkha-te chu chengho tura khuanu siam sa ang mai an nih thu a sawi.
Thawhlehni khan Dawrpui Multipurpose Hall-ah Mizoram Gorkha Youth Association (MGYA) Golden Jubilee lawmna chu khuallian niin chief minister hian a hmanpui a, jubilee commemorate-na lungphun a hawng nghal bawk.
Chief minister chuan Mizorama Gorkha thalaite kaihruaitu pawl chak tak MGYA awm chu vanneihthlak a tih thu sawiin, MGYA chu kaihruaitu tha ber leh rintlak a nih thu a sawi.
Chief minister chuan Gorkha-te chu hnam huaisen, tlawmngai leh themthiam tak an nih avanga British hun lai atanga ram tana kutke pawimawh an lo nih tawh thute a sawi a. Tlang mi ve tho leh nunnem an nih avangin pi leh puten an lo ngainat em em thu leh, vawiin thlengin innghirnghona awm miah lova inngeih taka chen ho a nih thu sawiin, Mizo leh Gorkha-te chu chengho tura khuanu siamsa ang mai an nih thu a sawi.
Kum 1966 ram buai lai pawha Gorkha thalaite Mizo rambuai kuli leh sahimna zawnga rammu botute zingah awmin, ‘Mizoram bak lu nghahna hmun kan nei lo’ tia rinawmna an lantir reng thin chu a thinlungah a cham reng thu a sawi bawk.
Chhingchhip Sainik School atanga National Defence Academy & Naval Academy Exam-a tling hmasa ber, Agastya Thapa leh mi hmasate chawimawina hun neih a ni bawk.
Chief minister chuan an sorkarin minority-te hmakhua a ngai em em a, an tana thil tha ti zelin thlamuang taka awm turin a chah a, a bik takin thangtharte kaihhruaina kawngah MGYA chu tang sauh sauh turin a chah bawk.
He hunah hian Central YMA President R. Lalngheta pawhin thu a sawi a ni.