RJD-in Patna-a Raj Bhavan March an huaihawtnaah Leader of Opposition (LoP) Tejashwi Yadav-a chu police-in an hreng a, Bihar-ah chuan politic-a inbeihna thawm a nasa hle.
Eptu party hian thla hmasaa Siwan district-a zirlaiten lungawi lohna an lantir laia venhim hna thawktu pakhatin AK-47 silai leka a kap sawi fiah tura sorkar phut nan kawng hi an zawh a. He thil thleng avang hian sorkarin zirlai pungkhawmte a hmachhawn danin sawi a hlawh phah hle.
Nilainia kawng zawhnaah hian RJD MP, MLA leh an hruaitu hlun tak takte rualin party worker thahnem tak telin JP Golambar-ah an pungkhawm hmasa a, Raj Bhavan an pan zui a ni.
RJD mi tam tak chu an hruaitu, Yadav-a police-in an khungna lirthei chungah an lawn a. AK-47 silai lem nena kawng zawh pawh an awm.
Yadav-a hian police-in an lak hran hma hian eptute chuan zirlaite chunga dikna hlen chhuah a nih hma chuan an kal zel dawn tih a sawi.
“Lung in hi kan hlau lo va, zirlaite dikna chanvo, hna nei lo tam lutuk, exam zawhna put tihtawp leh exam dan langtlang a awm theih nan chuan kan au zel dawn a ni,” a ti.
Police hian kawng zawhnaa telte hi tuiin an phut a, Yadav-a chuan Bihar Deputy Chief Minister Samrat Choudhary-a thupek veka hetianga che hi an ni tih a sawi.
“…heng thil hi Samrat Choudhary-a thupeka ti an ni a. Tuia inphuh hian eng danglamna mah a thlen lo va. Mipuite harhin khawlaiah an lo chhuak khawm a, sorkar hi a kun dawn a, hetianga tactic hian engmah hlawkna a nei lo va, hna a thawk pha lo,” a ti.
Zirlaiten NEET exam zawhna put duh lohna lantira July 25-a punkhawm an huaihawta AK047 silai lek chhuaktu police constable chu social media-a a video a darh hnuah hna atanga chawlh lailawktir (suspend) a ni tawh a. Police officer-te chuan a silai kahaah khan tumah hiam an awm lo va, an chhuinaah lungawi lohna lantir hmachhawnnaah khan silai hmet puak tura tihna engmah a awm lo niin an sawi.