A vawi khatna atan Zoram Medical College & Hospital (ZMC&H)-ah Open Heart Surgery (Coronary Artery Bypass Graft) chu hlawhtling taka neih a ni a, he inzai hautak tak hi damlo kum 69 mi chungah darkar ruk leh a chanve chhung neih a ni.
Nilaini khan lung zai thiam Cardiothoracic Surgeon Dr. Mary Hmingthantluangi leh Guwahati atanga Apollo Excel Hospital-a Cardiothoracic Surgeon, Dr. Intekhab Alam te chuan an neih pui a ni.
Damlo hian thla ruk kalta khan heart attack neiin, lung natnaah chuan zai hautak ber chi ‘Triple Vessel Disease’ a vei a ni.
Inzai hi darkar ruk leh a chanve chhung zet a awh a, doctor-te hian damlo ke-a thisen zam leh awm a mi hmangin thisen zam block pathum te chu an siam tha a ni.
Inzai chhung hian damlo lungphu chu titawpin, lung hnathawh hi khawl hmanga chhawk a ni a, thisen zam siam that a nih hnuah lung hi an tinung leh a ni.
He hna hautak takah hian ZMC&H Anaesthesiology Team leh Cardiologist Dr. Lalthafala te chuan khawl changkang tak tak hmangin zai chhung zawng uluk takin an vil bawk.
Zai zawh a nih hnu hian damlo hi ICU-ah enkawl chhunzawm turin dah luh a ni a. Damlo chhungte chuan a zaitu surgeon te, Anaesthesiology team leh OT team-te chungah lawmthu an sawi.
Phai atanga lo kal doctor pawhin ZMC team-te inbuatsaihna leh thiamna chu tha a tih thu sawiin a fak a, damdawi in lam hotute pawhin he hmalakna hi ngun takin an vil reng a ni.