Old Secretariat hlui kawtah Smart Meter vuah vanga harsatna tawktute Nilaini khan an pungkhawm a, smart meter vuah duh lohna ‘Peaceful Protest of Smart Meter Installation in Mizoram’ an nei a. Kalkhawmte hian a taka bawhzui tur resolution paruk an pass a ni.
He lungawi lohna lantirna kaihruaitu Zairemthanga chuan pawl anga lungawi lohna lantir an nih loh thu a sawi a. Aizawl bikah pawh smart meter hi la vuah kim lo mah se sawiselna a tam tawh hle tih a sawi a, meter bill hmasa aiin a let li atanga nga te, a let 10 thlenga sang te pawh an awm a ni tiin a sawi a. Thingtlang lama vuah a nih hmaa ennawn ngei an duh thu a sawi bawk.
Electric bill sang chungchang complaint thin mah se awmzia a awm lo va, bill kal dan thlengin a mumal lo hle tiin a sawi a. State dang tam tak pawhin smart meter hi an dodal mek a, court-a inkhing hial an awm bakah state thenkhat chuan mandatory-in an kalpui ve lo tih sawiin Mizoram sorkar pawhin a duh chuan hetianga kalpui ve loh theihna hi a nei a ni tiin a sawi.
Pungkhawmte hian hma lak zui turin smart meter vuah a nih hnua electric bill sang nasa lutuk hi sorkarin enfiah rawh se tih te, bill pun dan dik lo emaw felhlel deuh emaw hmuhchhuah a awm a, chutiang ang bill pung dik lo sorkarin a dawng a nih chuan mipui hnenah pe kir leh rawh se tihte, complain a awmin rang takin Power & Electricity department-in enfiah thin sela, department leh company inhnawn kual tawh suh se tih te, smart meter vuah tawh sa leh la vuah lohte pawh department-in uluk takin endik vek sela, endik a nih hma chuan vuah chhunzawm ni tawh suh se tih te, billing period tihdanglam dawnah emaw, sorkarin thil thar mipui sum bawm khawih che thei chi a chhawpchhuah dawn reng rengin mipui hnenah chiang taka hriattirin zirtirna pe hmasa tawh rawh se tih leh electric smart meter zirchiangtu tur committee superintending engineer chinin a kaihhruai ngei a rang thei ang berin din ni rawh se tih resolution te an pasa a ni.