Aizawl: Blessino Nursing School, Maubawk, Aizawl chuan an awmna veng chhung vantlang mipui tan nimin khan hnatlangin thlan an laih bakah a duh apiang tan a thlawnin BP check leh sugar test-sakna hun an hmang a, veng chhung kawngpui dungte thian faiin hna an thawk bawk.
Blessino Nursing School hian kum tin Nurses Day pualin a thlawnin BP check leh blood sugar test-te hi Maubawk, Bungkawn leh Khatla velahte an lo nei tawh thin a, Red Ribbon Club huaihawtin Civil Hospital tan thisen pawh kum tin an pe thin a ni. Hei bakah hian kum thum liam ta atang khan sorkar chawlh denchhenin Maubawk Branch YMA-te thlan laih puiin khawtlang tihfai hna pawh an lo thawk tawh thin a ni.
Blessino Nursing School hotute sawi danin, kum 2019 khan Mizoram Nursing Council recognition hmuin seat 30 nen bul an tan a, kum 2022 atangin Maubawk-ah hian an inbawk tan a ni. Kum 2025 khan Pharmacy Council of India recognition hmu lehin D.Pharm zirna seat 60 phalna an hmu a, July 2026 Higher & Technical exam-ah khan topper leh top 10 ah mi pali an tlin bakah mi 31-in distinction-ah an pass bawk a ni.
Pathian malsawmna dawng chho zelin tunah hian Graduate course hawng tur leh Blessino Academy KG1 atanga Class VI thleng hawn thar tawhte tiphuisui tur hian hma an la mek bawk.