Aizawl: YMA, Shillong Group leh MSU, Shillong ten NEIGRIHMS, Shillong-ah thisen an pe.
Dr. Memtombi, Blood Bank In-charge, NEIGRIHMS-in thisen an tlakchham a, damlo enkawlna atan mamawh tih a ngenna avangin an pe a. Hmeichhia leh mipa mi 53-in thisen an pe a ni.
YMA leh MSU hruaitute chuan thisen petute chungah lawmthu an sawi a. Mi dang nun chhanchhuah turin an thawhchhuahna chu ropui an tih thu leh, Dr. Memtombi leh NEIGRIHMS Blood Bank thawktute hnenah pawh hun tha an siam sak chu lawmawm an tih thu an sawi.
NEIGRIHMS-ah hian Mizo damlo kum tin mi 10,000 vel hi Mizoram atangin inentirin an awm thin a. Hemi te zingah hian damlo rethei tak tak leh thisen mamawh an tam hle. Hemi te hi a tul dan a zirin Shillong-a YMA leh MSU ten an lo pui thin.