Aizawl: North Eastern Regional Power Committee (NERPC) hnuaia hmarchhak state power minister-te chuan Union Power Minister Manoharlal Khattar chu Shram Shakti Bhavan, New Delhi-ah an hmu a. Hmarchhaka power sector tihchangtlunna tur leh regional power grid siam tha tura sum mamawh hrang hrangte an sawipui.
Thawhlehnia an inkawmna hi NERPC Chairman, Meghalaya Power Minister Metbah Lyngdoh kaihhruaina hnuaiah neih niin Mizoram P&E Minister F. Rodingliana, Arunachal Pradesh Deputy Chief Minister Chowna Mein leh official dangten an telpui a ni.
Inkawmnaah hian regional power grid tihchangtlunna tur grid modernisation leh priority project hrang hrang — SCADA/EMS leh Emergency Restoration System (ERS) tihpuitlinna tura sum ngaihtuahsak turin an ngen a. Tlangram chhengchhia a nih avanga sub-station dah belh a tul thute pawh an thlen.
Mizoram Power Minister F. Rodingliana chuan Gross Budgetary Support (GBS) 10% dah hran thin chu power sector tihhmasawn nan langtlang leh tangkai zawka hman a nih theih nan ruahmanna siamsak turin union minister hi a ngen bawk.
Union minister chuan state-te sum mamawh thlen hi union finance ministry a lo sawipui tur thu sawiin, project zawng zawng a thlawna tum vek a theih dawn loh avangin state sorkarte nen tangruala ruahmanna siam a tul thu a sawi a. Smart meter vuah pawh chak taka kalpui a, mipui hriatthiamna atan ‘check-meter’ vuah ngai pawimawh tura chahin transmission loss titlem tura hma la zel turin state minister-te hi a chah bawk a ni.