Aizawl: Mizo Zirlai Pawl (MZP)-in tun hnaia Supreme Court-a Mizo hnam dan khingtu, hnam dang pasal nei Mizo nu an dem thu an sawi.
Nilainia MZP Conference Hall-a MZP General Headquarters, Aizawl Executive Meeting vawi 655-na neihah Supreme Court-a Mizo hnam dan, ‘The Mizo Marriage & Inheritance of Property Act, 2026’ khingtu, hnam dang pasal nei Mizo nu chu MZP chuan a dem tak zet thu an sawi.
MZP President Dr. C. Lalremruata kaihhruai he meeting chuan hnam dang pasal neite chungchangah MZP ngaihdan a la pangngai reng thu an sawi a, political party-te pawh eng inthlanah mah hnam dang pasal neite hi candidate-a theh chhuak lo turin a ngen nawn leh tih an sawi.
Kum 2015 atang khan MZP hian hnam dang nupui/pasal neih loh inzirtirna a lo buatsaih tawh thin a, kum 2023 MLA election dawn pawh khan political party-te hnenah ngenna a lo thlen tawh thin a, hmana ticket pe luitute chungah pawh kawngzawh a lo buatsaih tawh thu an sawi bawk.
Tlabung khua chungchangah meeting chuan hmanlai atanga tun thlenga Mizote khua a nih avangin Chakmate lo luahlum tawh thin anga sawi awm chu history dik lo tuh tumna leh Mizoram mipui zah lohna a nih thute an sawi a. Mizo lalten an ram leh an ram luah chinte an humhalh nasat em avangin Tlabung hi Chakmate khua a ni thei ngai lo a ni tiin an sawi bawk.
Meeting chuan MZP Federal Council vawi 61-na agenda chungchang te, September 2 apianga an lo hman thin, ‘Hnam dang nupui/pasal nei lo tura inzirtirna ni’ chu kuminah pawh sikul hrang hranga neih chhunzawm leh nise tih te a rel a. Zirtirtute Ni (Teachers’ Day) pualin Aizawl chhung hmun hrang hrangah zirtirtute zahna thuziak tar chhunzawm leh siam nise tiin thutlukna an siam bawk.