Aizawl: Serchhip Police-ten phone bo an chhuichhuah parukte chu Ningani khan a neitute hnenah an hlan.
Mobilephone bote hi Central Equipment Identity Register (CEIR) system hmanga hmuh let an ni a, a neitute hnena pek kirna hun hi Serchhip Police Station-a Officer Incharge John Malsawmtluanga chuan a nei a ni.
John Malsawmtluanga chuan CEIR Portal hman a nih hnuah phone bo chhuichhuah zung zung theih a nih tawh thu a sawi.
Police Department chuan Serchhip mipuite chu an phone a bo chuan report zung zung turin an ngen a, phone kher lo pawi khawihna dangah pawh FIR thehluh leh ziah kawngahte mamawhtute tanpui tura an inhawn reng thu an sawi.
CEIR hi tu pawhin phone an hloha an block hmak theihna leh khawiah nge a awm tih kan zawn hmuh (track) theihna tura sorkar laipuia telecommunications department hmalakna hnuaia siam, central system (khawlpui) pakhat a ni.
A hnathawh ber chu ram chhunga mobile phone awm zawng zawngte chhinchhiah khawm leh thunun a ni.