Mizoram Legislative Assembly session thutkhawm neihah Chief Minister Lalduhoma chuan Human Rights Commission (HRC) chuan thatna tam tak nei mah se, a hnuaiah hian NGO-te hum theih an nih loh a hlauhthawnawm thu a sawi.
Speaker Lalbiakzama kaihhruaina hnuaia Ningania Assembly thutkhawm zawhna leh chhanna hunah, Home Minister K. Sapdanga chuan khawtlang thenfai kawngah HRC-in dalna a neih hriat a nih loh thu a sawi a. Commission hi thuneitu sang zawk ten din tura an tih anga din a nih thu sawiin, din fel a nih hnuah pawh state mi leh sa ngei Chairman tura tling an awm mai loh avangin nghah leh rih hret a nih thu leh Guwahati High Court Chief Justice-te nen pawh an sawi ho tawh thu House a hrilh.
HRC chungchanga zawhna sawifiah tura Speaker-in a sawm angin House Leader Lalduhoma, Chief Minister ni bawk chuan Commission hian thatna tam tak nei mah se, kawng eng emaw zawng taka dalna a neih tlat thu a sawi a. Mizoram phei chu NGO-ten khawtlang venna leh thil tha lo dona kawnga inhnamhnawih thukna state a nih bawk avangin, Human Rights Commission khauh taka a kal chuan NGO-te hum tel theih an nih loh a hlauhthawnawm thu a sawi a ni.