Aizawl: Mizoram chu ‘Winter Capital of India’-a siam a nih theih nana hmalakna langsar ber leh tourism tihlarna hmanrua atan Winter Festival 2026 chu neih a nih dawn thu Chief Minister Lalduhoma’n a sawi.
Thawhtanni khan P&PI Conference Hall-ah Chief Minister Lalduhoma hoin Winter Festival 2026 Organising Committee-te thukhawmin kumina hman dan tur ruahmanna te an rel a, nikum lama Festival buatsaih tawh dan te pawh an thlir let a. He thutkhawmah hian Tourism Minister Lalnghinglova Hmar leh department hrang hrang hotute an tel a ni.
Thutkhawmah thusawiin chief minister chuan Winter Festival hi Tourism Department bul tuma kalpui ni mah se, department zawng zawng thawhho ngai a nih avangin department hrang hrang hotute koh khawm an nih thu a sawi a. Mizoram leh entrepreneurship tihlarna a nih theih nan department hrang hrangte chu an hmalakna zawn theuhva mawhphurhna la a, inngaihven zui theuh turin a chah bawk.