Premier League-a manager ropui ber ber sawi chuan Arsene Wenger, Sir Alex Ferguson leh Pep Guardiola te an lo lang thin.
Heng mi pathumte hi Premier League club pakhat bik vawi 250 khelhpui thei zinga mi an ni a, anni ang hi Mikel Arteta chu ni ve tain mi bik 10-na chiah a ni.
Thawhtanni zana 1-0-a Aston Villa an hneh kha Arteta-a’n Gunners’ inkhel vawi 250 a kaihhruaina chiah a ni a, champions team hian an khelh dan phung mumal tak an lantir bawk.
Inkhel huntawp hamrik a rik rualin Villa Park-ah London atanga anmahni tantu zuitute chuan Arteta hnuaiah league nomawi an la leh ngei dawn tiin an au rual.
Arsenal hian tun season hi nomawi kawltu ni chungin bul an tan a. An elpui lian dang – Liverpool, Manchester City, Chelsea leh Manchester United chuan manager thar an nei vek a, anmahni tantute chuan champion nawn leh ngei an duh a, tawnhriat nei an kawl bik avangin an beisei pawh a sang.
Arsenal hian season hmasa khan league-a goal chhuah tlem ber niin kum 22 hnuah a vawi khat nan nomawi an la.
Kum sarih dawn Arteta kaihhruaina hnuaia an khelh hnuah Gunners hi an goal an venhim thiam avanga hriat hlawh leh dinchanpui mek an ni.
Aston Villa lakah pawh hian hei hi lantir lehin an goal zawnah mual neituin vawi khat mah pet an nei lo va, Bukayo Saka-a’n second-half-a a thun hmangin hnehna an chang.
Thawhtanni zana hnehna an chan hi Arteta kaihhruaia vawi 250 an khelhna mai a ni lo va, Guardiola, Ferguson leh Jurgen Klopp te dawta chak zat percentage nei sang ber a ni ta bawk.
Arteta hi Premier League manager tang lai zinga daih rei ber ni mekin hei hi Arsenal kalphung pawh a ni tel.
Arsenal hi thiah darh harsa anga hriat hlawh an ni mek tawh a, an player neih tharte ngei pawh chutianga khel thei tur mitthla chung leh insiam rem thei tur zel dapin Arteta-a’n a khelhtir dan thin mil zel an dap thin.
Tun hi Arsenal-in Premier League season bul tanna inkhel an chak ve ve zawn vawi ngana a ni tawh a, nomawi la leh thei tura rinkai an nihzia an pho lang.
Gunners hian Premier League-a an inlan tawh vawi hnihah an goal zawna pet vawi thum chauh an la nei a, Villa phei chuan an pet miah lo.
Season liam taa nomawi an chawi tum khan Gunners hian an tumpuite an goal zawna an pettir miah loh hi vawi ruk an nei a, 2003-04 season hnu lama hetiang zat an tumpuite dang char hneh ngun ber a nihrual.
Goalkeeper David Raya-a’n season thum liam ta zawngah goal chhuah loh tum ngah berin Golden Glove a dawng tawh a, hetih lai hian season thum liam taah an tlarhnung pahnih, William Saliba leh Gabriel Magalhaes te chu PFA team of the year-ah an tel ziah bawk.
March thla hnu atang khan Gunners hian Premier League-ah goal chhuah loh tum riat neiin hetih hun chhunga Europe-a league lian pangaa goal chhuah lo ngun ber, vawi kua chhuah lo, Juventus chauh an phak lo.
“Hetiang hi team anga tlarhnung an ven dan leh team anga goal an nawr dan chu a ni,” tiin Arsenal tana goal thun tam ber, Thierry Henry chuan Villa nena an inkhelh zawhah Sky Sports hnenah a sawi.
“Arsenal-a thil chiang tak pakhat chu an zavaiin tlan an ngai tih hi a ni a. Hetiang hi nomawi hlawh chhuah dan chu a ni a, tun dinhmunah chuan an tha em em a ni tih kan hmu thei a ni,” a ti bawk.