Aizawl: SELCO Foundation chuan Mamit, Lawngtlai leh Lunglei District-te tana hman tur Electronic Vaccine Carrier (EVC) 30 chu Health & Family Welfare Minister Lalrinpuii kaltlangin Mizoram sorkar hnenah Thawhlehni khan an hlan.
Health Minister Office Chamber, MINECO-ah EVC inhlanna hun hi Health & Family Welfare Dept. Commissioner & Secretary Lalzarmawii’n a kaihruai a, SELCO Foundation atangin technical report ngaihthlak a ni bawk.
He hunah hian Health department hotute, State Immunisation Team leh SELCO Foundation aiawhte bakah mi pawimawh dangte an tel a ni.
SELCO Foundation-in sorkar hnenah an hlan tak EVC-te hi ken kual awlsam leh zangkhai, solar energy hmanga thawk a ni a, a pakhat man hi Rs 1,50,000 vel a ni.
Health Minister Lalrinpuii chuan thusawiin, SELCO Foundation-in health centre 530 laiah solar energy an dah sak tawh a, Aizawl-ah 10 MT walk-in cooler an siam sak tawh bakah EVC 30 lai an pe leh chu lawmawm a tih thu a sawi. Heng EVC-te hi Health & Wellness Centre leh Sub-Centre-te awm lohna hmuna nu leh naupangte tan hri laka himna leh hriselna thlentu a nih ngei a beisei thu a sawi.
Minister chuan Mizoram chu tlangram a nih avangin hmun kilkhawr leh tlawhpawh harsa tak takte a awm thin tih sawiin, heng EVC-te hi darkar 35 chhung 2°C–8°C inkarah vaccine-te a vawn that theih avangin, hmun kilkhawra awmte’n a hun taka vaccine an lak theih nan a tangkai hle dawn tih a sawi.