Aizawl: Thawhlehni chawhnu dar 1 vel khan Khawhai khuaa Ngurkhuma-te chenna in a kang a, he chhiatna thlengah hian in nghaktu, an tunu, Lalhriatzuali (21) (Vohbik) chu a kang hlum. Chief Minister Lalduhoma chuan he chhiatna thleng hi pawi a tih thu sawiin, State Disaster Response Force (SDRF) dan angin a chhungte hnenah ralna Rs nuai 4 pek an nih tur thu a sawi.
Thu dawn danin, Ngurkhuma-te hi chhungkuah mi pali an ni a, chhiatna thlen lai hian Lalhriatzuali tih loh mi dang zawng chu an feh vek a ni. Thenawmten in hi a kang tih an hriat meuh chuan thelh rual lohvin a lo kang nasa hman tawh a, Assam Type in hi bungraw engmah chuh hman lohvin a kangral vek a ni. Lalhriatzuali hi a khumah thia hmuh a ni.
Chief Minister Lalduhoma chuan Ngurkhuma-te in a kang leh an tunu Lalhriatzuali’n nunna a chan chu pawi a tih thu leh a lainat thu a sawi a. SDRF dan anga ralna Rs nuai 4 pek an nih tur bakah, sorkar dan dinglaiin chhiatna tuartute tana tanpuina awm thei apiang ngaihtuahsak an nih tur thu a sawi bawk.