Aizawl: Lawngtlai district bawrhsap hova dan leh thupek kenkawh chungchanga thutkhawmna neihah ram mipuite himna leh dan tha taka zawm a nih theih nan September, 2026 atang hian Lawngtlai khawpui chhungah raltlan leh ram dang mi (foreigner)-te tan in luah remtih a ni tawh dawn lo.
He thutlukna hi District Administration (DC), Village Council, Young Lai Association (YLA) leh Police-te tanghova hmalakna kalpui tur a ni.
August 31 khan Bawrhsap hian dan leh thupek chungchang ngaihtuahin meeting a kaihruai a, he thutkhawmah hian ram chhunga mipuite himna bakah raltlan leh ramdangmite dinhmun leh chetvelna pawh ngun tak leh tha zawka enkawl a tulzia a sawi ho a ni. He hmalakna hian khawtlang muanna leh zalenna humhim a tum ber a ni.
Meeting thutlukna dang pakhatah chuan veng tinah ramdangmi leh raltlan lut leh chhuakte chhinchhiahna mumal tak neih ngei ni tawh se tih a ni bawk. A bikin raltlante zingah inhlawhfa thin an awm avangin, hnathawk duhte chuan khawtlang hruaitute hnena atanga an dinhmun thlir hnuah hnathawh remtihna (Work Permit) an lak hmasak phawt a ngai tawh dawn a ni.
Sorkar chhinchhiah atanga a lan danin, tun dinhmunah Lawngtlai district chhungah hian raltlan 7,425 an awm mek a ni. Heng zinga 6,064-te hi Myanmar atanga raltlana lut an ni a, 1,361-te hi Bangladesh atanga lut an ni bawk.