Michael Carrick-a chuan Premier League-a an elpuite aia sum an hmang tlem chu pawi ti lovin, Manchester United squad chu season hmasa aiin an tha zawk tih a sawi.
Casemiro an chhuahtir hnuah Manchester United chuan midfielder pathum – Carlos Baleba, Youri Tielemans leh Andrey Santos te la lutin £ maktaduai 148 an hmang a, player dang an lak belh lo thung.
Manchester City chuan £ maktaduai 400 aia tam hmangin Chelsea leh Tottenham ten £ maktaduai 300 aia tam ve ve an hmang a. Arsenal, Aston Villa, Newcastle leh Liverpool te chuan £ maktaduai 200 aia tam an hmang hlawm bawk.
Manchester United thil tih tawhah Carrick hi a lungawi hle a, “Season hmasaa kan team neih aia tha zawka chhuah kan duh a, chu chu kan puitlin ngei bawk. Chumi kawngah chuan hna tha tak kan thawkin ka hria. Sum dinhmun leh kan thawhchhuah theih chin hi kan tawn mek a ni a, kan neih ang ang atang hian hlawk theih dan ber ngaihtuah kan tum mai a ni,” a ti.
“Kan player kan lak luh tharte hi ka hlimpui tak zet a. Kan player lak luhte thatna kan hre chiang viauin ka hria a, ka lungawi hle,” a ti.
Carrick-a chuan United chu sum hman kawngah khuahkhirh an nih loh thu a sawi a, “Tuna kan dinhmun dik tak zawk a ni mai. Sum hman zat tur chungchang ka sawi lo. Sum zat eng pawh ni se, hlawk ber tura hman a pawimawh a, kan sum hman atang pawhin rinhlelhawm miah loin hlawkna kan hmu a, kan player lak luh takte atang phei chuan a aia tam pawh kan hlawkpui mai thei,” a ti.