Aizawl: Mizorama ziak leh chhiar thiam zat (literacy rate) chu zaa 99.8-ah a kai chho va. Sorkar chuan puitling lehkha chhiar leh ziak thiam lo awm chhunten an thiam theihna turin hma lak zel a tum thu International Literacy Day hmannaah sawi a ni.
Thawhlehnia International Literacy Day vawi 60-na pual inkhawm Directorate of School Education, Aizawlah neih a ni a. He inkhawmah hian School Education Department Commissioner & Secretary K. Lalthawmmawia chuan Mizoramin ziak leh chhiar thiamna kawnga hma a sawn zelnaah khawtlang mipui leh volunteer-ten tha an thawh hlawk hle a, an innghahna lungphum pawimawh tih a sawi a. “Tunah hian fully literate state ni mah ila, hmabakah tih tur tam tak an la nei a, kan thiamna te an tahhriam belh zel a ngai a ni,” a ti.
He hunah hian School Education Minister Dr. Vanlalthlana thuchah pawh chhiar chhuah a ni a. A thuchahah chuan ziak leh chhiar thiam tura inzirtirna hian digital skill, vocational training leh environmental te a huam tel a ngai tawh tih a sawi a. India-ah ziak leh chhiar thiam kawnga Mizoramin hma a hruai chhunzawm zel theih nan sorkar leh a mawhphurtu department kuta dah mai lovin a tul anga thawkho zel turin kohhran pawl hrang hrangte, tlawmngai pawl te leh zirlai pawlte, mi mal thahnem ngaite leh Zoram mipuite chu theihtawp chhuaha thawk ho zel turin a sawm.
Hemi ni pual inkhawm hian ULLAS-RAERIP worksheets, kum 2026-27 Skill Training Programme leh ‘220 Schools Go Live’ hmalaknate tlangzarh nghal a ni bawk.
Tun hnai khan Mizoram chu India-a ‘Fully Literate State’ (lehkha ziak leh chhiar thiam vekna state) hmasa berah puan a lo ni tawh a. Sorkar chuan kum 2027-a ram pum chhiarpui (national census) neih a nih hmaa lehkha ziak leh chhiar thiam lo la awm te zawng zawng hi zirtir hman ngei a tum hle.
Mizoram ziak leh chhiar dinhmun hi sorkar laipui hmalaknaa Periodic Labour Force Survey Annual Report 2023-2024 atangin zaa 98.2 a ni a, Periodic Labour Force Survey Annual Report 2025-26 atangin Mizoram literacy rate chu za 99.8 a kai chho tawh a ni.