Mizo Zaimi Insuihkhawm (MZI), General Headquarters buatsaih 2nd Inter High School & Higher Secondary School beat contest-ah St. Pauls Higher Secondary School band — Count 2 Five — chu pakhatna atan puan a ni.
2nd Inter High School & Higher Secondary School Beat Contest 2026 — Grand Finale hi Ningani khan Vana Pa Hall-ah neih niin, Adviser to chief minister Lalmuanpuia Punte, MLA, chuan khuallian niin a hmanpui.
He intihsiaknaah hian school hrang hrang atangin beat group 39-in an demo video an theh lut a. Endik tuten final round lut band 16 an thlang chhuak a, anni hian Nilaini leh Ningani khan Vana Pa hall-ah final round inelna an hmachhawn a ni.
Mount Carmel School hminga chhuak Carmel Band chu pahnihna an ni a, pathumna pawh Mount Carmel band tho Sereine ten an ni. Intihsiaka pakhatna hian Rs 70,000 an dawng a, pahnihnain Rs 50,000 leh pathumnain Rs 30,000 an dawng a, a bak 13 ten Rs. 10,000 theuh an dawng bawk.
Mi mal chawimawina-a lawmman la te chu : Best Vocal – Lalchhanchhuaha, Rosebud Band 2, Rosebud School ; Best Guitar – Harry Lalruatfela, Count 2 Five, St Pauls HSS ; Best Keyboardist – Lalrinsanga Pachuau, Carmel Band, Mount Carmel School; Best Bassist – Lalhmingmawia, Avaia, Govt Mizo HSS leh Best Drummer- H. Lalremruata, Carmel Band, Mount Carmel School te thlan an ni.
Audition round-ah hian Aizawl District pawn atangin Lunglei , Hnahthial, Saitual leh Mamit District atang ten tel an awm a, Final Round inelna hmachhawn te chu :
- THEOKRATZ – Govt Mizo HSS
- BAND2 – Rosebud HSS
- ZOTRIBE – Springfiled HSS
- SEREINE – Mt Carmel HSS
- CHRIST KINGDOM – Christ Kingdom HSS
- REVERIE – St.Pauls HSS
- SEGNO – Govt Saitual HSS
- BAND 1- Rosebud HSS
- REMEDY FOR CHRIST – Synod HSS
- PASSIONNE – St.Pauls HSS
- BAND 1- Staines Memorial
- CARAMEL BAND – Mt.Carmel HSS
- AVAIA – Govt. Mizo HSS
- St.ANDREWS SCHOOL – St. Andrews School
- COUNT 2 FIVE – St. Pauls HSS
- SLOUBOURN – Govt. Mizo HSS