Aizawl khawpui chhungah tui harsatna thawm a ring sawt hle a, chhungkaw tam tak buaina a ni chho mek.
PHE minister chuan Aizawl Greater Water Supply Scheme Phase III chu leiminin a hnawh pin avangin tui pump theih a ni lo niin a sawi a, PHE lamin tui harsatna an tawhah hrethiam turin mipuite ngenna a siam a, a sawi tur tak pawh a ni.
Mahse, ngun taka ngaihtuah chuan tui hi a changtute hian an ngaihtuah thiam tur niin a ngaih theih thung. Ruah a sur tha duh viau a, chhungkaw tam tak chuan tui dahkhawlna neiin, a dawn thleng tha tak pawh an nei a ni thei. Mahse chutiang nei lo, mi inhnuai luaha khawsa, khawsak harsa tak tak chhungkaw tam zawk hi chu kan ni a, Aizawlah hian tuidawn khawlna nei lo kan tam hle bawk.
Tui a harsat chiahah chung mite chu kan buai a, tui leina tur nei lovin kan awm a, nitin hnathawka thawhchhuah ngai, mahni ei leh in tur pawh thawkchhuak tawk tawk kan tam avang hian tui lei tura intih ngawt chi lah a ni si lo.
Sorkar hian tui harsatna hi kum chanve hmalam atang khan a sawi tawh a, vawiin thlengin a ‘solve’ na an la nei lo a, a hotu sang leh sorkara thiltithei tak takte hi chu an buai ngai dawn lo. Tin, an hman tur hi department in a pe thei lo a nih pawha leina nei a, mi ko mai thei an ni. Mipuite zawk hi min ngaihtuah a ngai ta.
Tui harsatna sawi ringawt fo zel hi a hun tawh lo a, tui hman tur nei lo, harsa tak takte hi an ngaihtuah a ngai tawh. Mahni thawmhnaw pawh sufai ngam tawh lo, inbual fai pawh tim ngawih ngawih hi an mipuite kan awm tih an hriat a hun ta e! A tul a nih chuan tunhma ang khan chawisak mai se la, tuilakna a lo tha lo emaw, a lo nu emaw a nih pawhin tuichawina lirthei tam tak a awm tih hre chungin mipuite harsatna min sutkiansak thuai tawh teh se.