Aizawl: Mizoram pum huap ‘State Level Launching of Swachhata Hi Seva (SHS) 2026’ chu Ningani chawhma khan UD&PA Department leh PHE Department tangkawp buatsaihin UD&PA Auditorium, MINECO-ah hawn a ni a. He faina campaign hi UD&PA Minister K. Sapdanga chuan khuallian niin a tlangzarh.
Minister K. Sapdanga chuan Zo nun mawi — tlawmngaihna nen faina chu bul tan a, in atanga bawlhhlawh thliar hran zawm tlat turin mipuite a chah a, zirlaite pawh chhungkuaa faina kaihruaitu ni turin a chah bawk.
Khualzahawm PHED Minister Prof. Lalnilawma pawhin fai hi hriselna leh changkanna a nih thu sawiin, tuithianghlim leh hriselna a inzawm tlat avangin midang tih turah dah lovin mahni ngeiin faina bul tan tura a ngen a ni.
Swachhata Hi Seva 2026 hi September 17 atanga October 17, 2026 chhung hman tur a ni a. Hemi hun chhung hian Mizorama district khawpui, notified town leh thingtlang khuaa sikul, bazar, tuikhur, mipui punkhawmna hmun leh zun in/ek inte tihfai beihpui thlak a ni dawn a ni.
Campaign chhung hian zirna inah intihsiakna hrang hrang, sanitation worker-te chawimawina leh health check-up buatsaih bakah, October 1, 2026 hian ram pum huapin ‘Ek Din, Ek Ghanta, Ek Saath’ faina hnatlangpui neih a ni bawk ang.
Tlangzarh inkhawm hi PHED Secretary Zodingpuii’n a kaihruai a, UD&PA Commissioner & Secretary V. Lalsangliana’n keynote address sawiin, UD&PA Director Jacob Lalawmpuia’n technical report a pe a. UD&PA Joint Secretary Zarzokimi kaihhruaiin kalkhawm ten faina thutiam (Swachhata Pledge) an chham rual a ni.