- Dr. C. Lalrampana
“Tual i that tur a ni lo’’ tih leh “Tupawh a unau hua chu tualthat a ni; tualthattu tumah chatuana nunna pai reng reng an awm lo”
Mizo kristiante hian tawngkam chuan Pathian thu kan sawi peih hle. Tuktin zantin whatsapp group leh social media platform hrang hrangah Pathian aia thu zawk niawm ang hrimin ninawm tham khawpin Bible chang hrang hrang post-in kan rak chuah chuah thin. Mahse, a taka Pathian zahna nei hauh si lo; chatuan nunna pai reng reng si lo awm khawm kan ni ber mai awm e. Kumin chho ringawt pawh hian tualthahna a thleng zing ta malh malh hle mai! Zahna nachang lah kan hre der si lo. Pathian hian engtin tak ngai ang maw?
New Builum khua, Kolasib mi Zakaria Lalhriattluanga, kum 29, Assam Regiment-a sipai, Jammu & Kashmir-a awm, chawlh laa lo haw, mahni in lum pawh a la thlen hmaa sawisak hlum a ni hian rilru a khawih hle mai. Kristian rama thil thlengah chuan a rapthlak takzet a ni.
Sept 20, 2026, Pathianni tlai khan NH-306, Bualpui khaw bul, thingpui huan (Coffee Board plantation) bula thleng a ni. Kawng chhe lutuk avangin motor pahnih an inpel thei lova, inhnialna a chhuak.
Zakaria hi Lengpui Airport atanga a thianpa truck driver John Laltanpuia a hmuak a, an pahnihin New Builum lam an pan lai a ni. Bualpui-a an thian Lalchawiliana te inah thingpui ina an chawlh hahdam hnuah an tlan chhunzawm a. Kawng a pin laiin John-a nen truck dang driver nen an inhnal a. Chutih laiin Kawnpui Hmar Veng atanga picnic xo hlim lo haw tleirawl rual, zu rui nia an sawi mi 20 vel pickup truck-a lo kalte an lo inrawlh ve a, John-a an sawisa tan a. Zakaria hian a thianpa chhan tumin a lo inrawlh ve a, amah zawk chu kutthlak rawn niin a hmunah a thi nghal. John-a pawhIn hliam tenau a tuar bawk.
Hemi hnu hian Zakaria nu Lalthazovi-in FIR a thehluh lut a, Kolasib SP Lalrinpuia Varte chuan “mi 8 man a ni” tih a puang – mipa puitling 5, hmeichhe 1 leh naupang 2. Hmar Veng, Kawnpui khua mi vek an ni. Puitling 6 te chu Jail-a dah an ni a, naupang 2-te chu Juvenile Justice Board hmaah hruai an ni. Post-mortem zawh hnuah Sept 22 khan sipai zahna famkim nen vui a ni.
A chhungte sawi danin Zakaria hi kum 2017-a Assam Regiment-a lut a ni a, a pa kum 78 VL Duailova leh a nu kum 60-te enkawltu ber, chhungkaw innghahna a ni. In sakna loan-te pawh a la rul mek a ni.
Kawnpui Hmar Veng VC leh YMA-te pawhin he thil thleng avang hian New Builum khawtlang hnenah ngaihdam an dil a, dan anga hremna khauh ber pe turin an phut thu an sawi.
Post-mortem result kimchang (injury detail tak) chu Police leh a chhungte lam atangin an la tlangzarh lo. SP Lalrinpuia Varte sawi dan chuan: “Post-mortem hi zawh fel a ni tawh” tih a puang. A zawh hnuah Sep 22, Thawhtanni khan full military honours nen New Builum-ah vui a ni.
Thudang official-in an chhuahah chuan “A hmunah a thi” tih leh “kutthlakna avanga thi” tih chauh a la awm a, a lu a hliam em, thisen a chhuak em, tih ang chi forensic report chipchiar chu Court-a charge sheet thehluh hma chu an puang ngai lo tlangpui.
Thawm thenkhat witness sawi dan chuan zurui tleirawl rualin a thianpa an sawisak lai chhanhim a tum laia lo bei an ni a, a luah leh a taksaah na taka kutthlak a tuar nia sawi a ni, mahse, hei hi post-mortem result official tihna a ni lo.
Postmortem Result hi official-a chhuah a nih hunah thil engkim a la chiang thei dawn chauh a ni. Kolasib District Hospital emaw SP Office update a awm thuai beisei ila.
Tunhmaa kan mizia kha khawiah nge a awm tak? Insualrawn, inbeihrawnte hi dawihzep thawmhnawah kan ngai thin. Mahse, tunah chuan inbeihrawn, insualrawn insawisak hlumte hi intih theih nan kan hmang ta ni berin a lang. Mizo kan ni ta lo zawk em ni? nge Covid-19 hripui khan new normal tha lo takah min hruai lut mek ta zawk em ni?
Zakaria khawih rawntute hian mi pakhat chauh hi khati taka beihrawn a tul em ni? Tawngkaa sawi fel mai theih reng si, kut inthlak luih tal kan ching thin hi thil pawi tak a nih bakah mawlna chikhat a ni. Chuvangin, Mizote hi kan inenfiah a van tul tehlul em! Pathian thusawi, inkhawm, tawngtai, gospel camping, crusade, inkhawmpui uar ber leh taima ber awmkhwm si hian a takin Pathian thu nunpui kan tum lo. Rinna leh thiltih a inkawp tlat tur a ni. Sawi ringawt leh hriatna ringawt hian kan nunah a tha zawnga rah chhuah a neih si loh chuan engmah sawtna a nei lo. Sorkar hian inbeihrawn, Insual rawn chingte hi dimna nei miah lovin hrem ngam thin se tun ai hian a tha zawngin hma kan sawn ngei ang.