Premier League-in sum leh pai inkaihhruaina dan bawhchhia nia an hekna thubuai 115 a siamsak zinga 114-ah Manchester City chu thiam loh chantir an ni.
Thutlukna hi kum 2009 leh 2018 inkar chhunga dan kalha che nia City an hekna thubuai rei tak ngaihtuah tawh kharna a ni a. Independent commission chuan Manchester khawpui club hi an hekna thubuai zawng zawng deuhthawah thiam loh chantir mah se an hremna tur erawh puan a la ni rih lo.
Thubuaite hi sum leh pai dinhmun dik tak thehlut lova tar lan, player leh manager hmasa, Roberto Mancini hlawh leh lawmman hmuhte thup bakah Premier League profitability & sustainability rules (PSR) bawhchhia nia hekna hrang hrangte a ni.
City chuan heng hekna hi an lo pha fo thin a, thutlukna pawh hi khin let an tum rin a ni a. Club chuan Premier League kalphung hman lai hi a la zo lo a, thil pawimawh tak tak hlen chhuah tur a la awm a, thuruk vawn a tulna pawh a la awm zel thu an sawi.
Premier League-in a chhui hnuah thubuai hi February, 2023 khan independent commission hnena hlan a ni a, a ngaihtuahna hi September leh December, 2024 inkarah khan neih a ni a. Premier League dan hnuaiah hremna hrang hrang, pawisa chawitir, point paihsak leh hremna dangte pe thei mah se eng ang takin nge an hrem dawn tih chu puanzar a la ni rih lo a ni.
Thutlukna hian kum tam tak ching fel loa awm tawh niin thil thleng lian tak a ni a, club pawh nasa takin a nghawng thei dawn a ni.
Sheikh Mansour-a Abu Dhabi United Group-in kum 2008-a club an lei hnuah City hian Premier League nomawi pariat, FA Cup pali, League Cup pasarih leh Champions League pakhat an la tawh a. Nomawi lian parukte hi Premier League-in an laka thubuai an siam hnua an lak an ni.
A hma, February, 2020-ah pawh khan club hian European football thuneitu sang, UEFA hnen atangin hremna an lo tawk tawh a. Der Spiegel-a mi mal thuruk tihchhuah atanga Financial Fair Play (FFP) dan bawhchhia nia hek an nih avangin UEFA inelna atanga kum hnih hrem leh Euro maktaduai 30 chawitir an lo ni tawh a ni.
Thla nga a liam hnuah Court of Arbitration for Sport (CAS) chuan kum hnih hremna chu a hlip a, FFP dan bawhchhia nia hekna chu fiahna tling tawk a awm loh vang emaw, UEFA dan hnuaia a hun a liam tawh vang emawa hremna chu hlip an nih thu an puang.
CAS chuan fiahna pawimawh tak tak te theh lut tura UEFA thawhpui duh lohnaah Manchester City chu thiam loh chantirin, he dan bawhchhiatna hi pawi tak a ni tih sawiin, Pound maktaduai 8.8 chawitir an ni chu an pawm thlap thung.
- Eng thubuai nge an awrhtir?
Thubuai 54 chu 2009-10 leh 2017-18 inkarah sum leh pai chungchangah thu dik pe chhuak lo nia puh chungchang a ni.
Thubuai 14 chu 2009-10 atanga 2017-18 inkarah player leh manager-te hlawh leh pawisa pek chhuah dan chipchiar leh dik tak pek chhuah loh vang a ni.
Thubuai panga chu 2013-14 leh 2017-18 inkarah UEFA dan, FFP tela zawm tawk loh chungchang a ni.
Thubuai pasarih chu 2015-16 atanga 2017-18 inkarah Premier League PSR dan bawhchhiat vang a ni.
Thubuai 35 chu December, 2018 atanga February, 2023 inkarah Premier League-in an chhuinaa thawhpui that duh loh vang a ni.