Aizawl: P&E Minister F Rodingliana chuan, “Val Upa Council (VUC)-a kan innghah lutuknate hi min thiahsak a ni mai thei a ni,” a ti.
Thawhtannia ZPM party chhung inkhawmah thu sawiin F. Rodingliana chuan, “Pathianin ZPM hi min hruai a, innghahna dang kan neih a phal lo a, VUC-te pawh hi kan lo chhuang lutuk a ni mahna, chuvangin, anmahnia kan innghah lutukna te hi min thiahsak a ni mai thei a ni,” tiin, Pathianah chauh innghat turin party mipui a fuih.
P&E minister chuan smart meter chungchanga complaint runpui buatsaiha complaint dawn 1,340 zinga 1,067 chin fel nghal a nih thu a sawi a. Check meter leh smart meter inmil 102 awmin, smart meter kal chak bik pakua leh kal muang 14 te chu testing bench-ah test zui tur a nih thu a sawi.
Aizawlah smart meter consumer 1,30,000 vel awm mekin meter reader 150 chauh an awm avangin smart meter hian harsatna tam tak a tihziaawm a beisei thu a sawi a, ZPM sorkar chuan electric bill a tipung lo tih leh FY 2018-19 atanga FY 2022-23 inkara domestic category power hralhna rate pun dan average chhuakin unit khatah Rs. 0.40 a kal pui zel a nih thu a sawi bawk.
Commerce & industries minister chuan New Market Building (ACC Building leh Foreign Lane) sak mek a sawi a, MNF ministry hnuaia seat pek tura inremna siam zat 1,419 an awm thu a sawi a. Foreign lane lamah emergency exit siam belh a nih avangin seat a tlem sawt a, seat chang tur an tam em avangin hna a hautak a. Dan lo anga seat pek eng emaw zat en dik leh a nih thu leh seat awm thei hmun tlem azawng a awm leh theih a rinawm thu a sawi bawk.