Aizawl: Khawvela Scientist tha rual thlanchhuah, Elsevier leh Stanford University tangkawpin an buatsaih ‘Global Top 2% Scientists 2026’ list-ah Mizo scientist Dr. Lalduhsanga Pachuau a tel.
Aizawl Zemabawk a Thangsavunga leh Lalhlimpuii te fapa Dr. Lalduhsanga hi Assam University, Silchar-ah Assistant Professor hna thawk mekin, Dibrugarh University atangin B.Pharm atanga PhD thleng a zir chhuak a ni.
M.Pharm a zir chhung hian sorkar laipui MHRD hnuaiah GATE Scholarship a lo dawng tawh a, kum 2007 atanga 2014 chhung khan RIPANS, Aizawl-ah Lecturer a lo ni tawh bawk.
Dr. Lalduhsanga hian a hnathawh leh hlawhtlinna avangin chawimawina hrang hrang a lo dawng tawh a, kum 2019 khan Bangkok-ah Society for Pharmaceutical Education & Research leh Thai Industrial Pharmacists Association tangkawp chuan ‘Young Scientist Award’ an lo hlan tawh a ni.
Kum 2017-a ‘DBT-ISNM Fellowship’ a dawn bakah, Anna University leh NIPER-a International Conference hrang hrangah ‘Best Poster Award’ a lo dawng tawh a, kum 2019 khan Dr. C. Zothanmawia nen tangkawpin ‘Damdawi leh a kaihhnawihte’ tih lehkhabu an lo ziak tawh bawk a ni.